Shanaia, nilantad ang mala-panaginip na pag-ibig
Papausbong na damdamin ang tema ng State of Mind, ang bagong single ng rising Kapamilya singer-actress na si Shanaia Gomez.
Mula sa komposisyon at produksyon ni Jeremy Glinoga ang awitin na tungkol sa mala-panaginip na pag-ibig. Nagsilbing supervising producer din nito ang StarPop label head na si Roque “Rox” Santos.
Sinundan nito ang naunang singles ni Shanaia na Cloud 9 at Slow Dancing na umiikot din sa tema ng pag-ibig.
Nagsimula ang music career ni Shanaia nang sumali ito sa unang season ng Idol Philippines noong 2019. Inilunsad naman niya ang debut single na Para Sa’yo noong 2022 na naging bahagi ng Spotify EQUAL Philippines playlist.
Bukod sa musika, nakilala rin siya bilang housemate sa Pinoy Big Brother: Kumunity Season 10. Pinasok din niya ang pagiging aktres at bumida sa iba’t ibang Kapamilya series tulad ng Click, Like, Share, He’s Into Her, at FPJ’s Batang Quiapo. Nitong nakaraang taon, umani siya ng papuri para sa kanyang performance sa comedy musical na The 25th Annual Putnam County Spelling Bee at sa iWantTFC horror film na Gatekeeper.
Available ang bagong awitin ni Shanaia na State of Mind sa iba’t ibang digital streaming platforms. Para sa ibang detalye, sundan ang StarPop sa Facebook, X (Twitter), Instagram at TikTok.
- Latest
