OG Kapuso na babalik, hinuhulaan kung si Angel o si Iza

Lumutang si Angel Locsin kamakailan sa X na dating Twitter upang ipaalam na na-hack ito.

Eh agad namang tumulong ang asawa niyang si Neil Arce upang ipaalam na recovered na ang account niya.

Pero laking gulat ng fans/followers ni Angel nang siya mismo ang nagsabing recovered na niya ang account niya, huh!

Eh matagal kasing hindi nagparamdam sa social media si Angel. Mas pinili niyang manahimik bilang Mrs. Arce.

Eh kasabay ng pag-iingay sa social media ni Angel, saka naman may lumabas din sa socmed na post mula sa 24 Oras entertainment reporter na si Lhar Santiago patungkol sa isang OG Kapuso star na may karapatang bumalik sa GMA.

May humula na si Iza Calzado ang babalik sa GMA lalo na’t napanood siya sa festival movie ng GMA Pictures na Green Bones.

Pero mas maraming humula na si Angel ang tinutukoy lalo na’t may linya pa ng kantang Narda na tawag kay Darna kapag ordinaryo siyang tao. Eh gumanap na Darna si Angel, ‘di ba?

Maghintay na lang tayo kung sino ang OG Kapuso na magbabalik sa kanyang dating network!