Jak, namamayagpag sa pagbebenta ng genital wash

Taong 2023 nang sumabak si Jak Roberto sa pagnenegosyo. Sobrang tutok ang Kapuso actor sa kanyang JC Essentials na nagbebenta ng mga produktong pampaganda at pampabango na panlalaki at pambabae. Ayon kay Jak ay hindi naging madali ang kanyang pinagdaanan upang magkaroon ng sariling negosyo. “Grabe! Sobrang challenging po. Kasi una ‘yung papers, ‘yung mga business permit, siyempre ‘yung mga office. Kasi requirements ‘yan para makapag-apply ka ng business permit. Doon ako naglabas ng kapital. One person corporation ako, wala akong partners. Kaya ako talaga ang kailangang gumalaw, mag-isip ng strategies, marketing. Kailangan meron kang logo, brand name, product name,” nakangiting pahayag ni Jak sa Pera Paraan show ni Susan Enriquez.

Madalas na nakakapag-live selling ang binata ng kanyang mga produkto. Masculine wash umano ang pinakamabili sa lahat ng mga itinitinda ni Jak.

“Genital wash siya, pwede rin siya sa underarms, batok, legs, sa mga singit-singit. ‘Yung masculine wash naisip ko kasi may mga friends ako na naghahanap. Dati bumibili po sila sa ibang bansa. Hindi nila alam na meron na dito sa Pilipinas. Dinivelop ko siya, ako mismo nag-iisip kung ano ‘yung mga dapat na content ng product. Anti-bacterial, pang-block ng body odor,” pagdedetalye ng aktor.

Para kay Jak ay nakakapagod din ang pagkakaroon ng sariling negosyo. Masaya lamang sa pakiramdam ng binata dahil nagkaroon na ng katuparan ang mga pinapangarap lamang noon.

“TIni-take ko siya as a challenge. ‘Yung paguran talaga normal ‘yon. Kasi wala namang mabilis na trabaho talaga. So ‘pag dumarating ako sa point na gano’n, iniisip ko na ito ‘yung pinapangarap ko. Business ko na ito, hawak ko na ‘yon kung kikita siya o hindi. Kaya kailangan ko siyang tutukan. Kailangan ko talaga siyang asikasuhin,” makahulugang paliwanag ng binata.

Carla, babalikan ang Japan

Huling dalawang linggo na ng Widows’ War na pinagbibidahan nina Bea Alonzo at Carla Abellana. Nakapagplano na raw si Carla na magbakasyon sa Japan upang makapagpahinga pagkatapos ng ilang buwang pagtatrabaho. “I actually made plans already. Siguro a month after Widows’ War babalik akong Tokyo. Japan in general is one of my favorite countries. So excited ako,” pagbabahagi ni Carla.

Para sa Kapuso actress ay importanteng nakapagpapahinga pagkatapos ng mahaba-habang trabaho. Mahalaga rin kay Carla na makawala sa kanyang karakter bilang si Georgina pagkatapos ng serye. “Hindi ko na iisipin ‘yung schedule, yung taping, ‘yung role ko, kung ano ‘yung babalikan kong show. Kumbaga makakapag-travel ako, mag-sign off na talaga ako. Enjoy lang ‘yung well-deserved vacation,” paglalahad ng aktres. (Reports from JCC)