Dear Tito Miguel,
Ako diay si Marjun, taga Carmen, Cebu. Naa koy crush nga ginganlan og Shantelle nga silingan rapud namo. Ambot lang kung tarong pa ba ni akong panghuna-huna. Dili makompleto akong adlaw, kun dili makakita niya. Motabang mana siya og bantay sa karenderya sa iyang mama. Usahay bisan busog ko, mokaon lang gyud ko sa ilang karenderya aron lang gyud makakita sa iyang kaguwapa. Wala pud ko'y plano nga modiskarte niya kay naa man siya'y uyab. Wala pud siya kahibalo nga na-crush ko niya. Kontento ug ma-hapoy rako kung makakita niya. Friends pud mi sa Facebook, ug nice kaayo ang feelings motan-aw ko sa iyang photos. Klarohon lang nako, wala pud ko'y daotang plano niya. Ganahan ra gyud ko sa iyang kaguwapa. Tulo ka buwan nako nga ingon niini. Unsa akong buhaton para mawala akong pagkaadik sa iyang kaguwapa? - Marjun-
Marjun,
Dili problema ang maibog. Labi na sa imong sitwasyon, kahibawo ka asa ra ka taman, dili ka modiskarte kay naa siya’y uyab, ug kuntento na ka’g makakita niya. Pero basin manambok ka, laliman ka’g mokaon gihapon maski busog aron lang makakita niya.
Tulo ka buwan pa man kaha, pasagdi lang imong kaugalingon, ayaw pugsa nga mawala dayon. Usahay mawala ra na’g iyaha, labi na’g makakita ka’g lain nga libre panguyaban. Kun dili gyud mawala, lagmit tungod ka’y naghinam hinam ka niya, kinahanglan gyud matagbaw ka.
Usa ka pamaagi ka’y imo siya duolon ug amigahon. Kasagaran man gud kaibog tungod lamang ka’y wala pa nimo siya mailhan sa personal. Kun magkahigala na mo’g magkasuod, hinay hinay mawala ang misteryo sa kun kinsa ug unsa siya. Dili ka kabantay, magkahilis sab ang imong gusto niya o pagnanasa ba kaha.
Basin mapun-an hinuon, imong gusto niya magkalawom. Kun mao, angay ka mokumpisal niya. Ingna kinahanglan na ka modistansiya kay dugay na ka naibog niya apan ni respetar ka sa iyang relasyon. Kun unsa iyang reaksyon, diha ka manukad asa padulong.
Lagmit moingon angay ka mopalayo ka’y duna siya’y uyab. Dawata. Ang iyang pagbalibad himoa nga rason aron dili na ka mag-ilusyon. Ang pagkalimot niya masayon sayon.
Kun mosulti dili ka kinahanglan mopalayo ka’y total higala ra man mo, ingna kinahanglan gihapon, kay labaw pa sa amiga imong gusto niya. — Tito Miguel
Magpatambag ka? Ipada kang Tito Miguel: 0991-318-9366