Uyab nga kusog moyawyaw

Dear Tito Miguel ,

Maayong adlaw , ako diay si  Janine , taga Barangay Mabolo , Cebu City.  Naproblema ko sa akong uyab nga si NJ  kay grabe kaayo ka maldito. Gamay lang namo nga problema ,kusog na kaayo magyawyaw. Dili man hinoun siya manapat , apan   kusog lang gyud magyawyaw . Laktod pagkaistorya , alingog-ngog na kaayo. Kapila nana siya nako gibadlong apan dili gyud siya mopatoo . Puwede ra baya gyud unta  mag-istorya  og tarong if  dunay mga butang nga dili mi magkasinabot , ug dili na kinahanglan nga magyawyaw pa. Gikapoy nako Tito Miguel, unsaon mani nako siya ? — Janine

* * *

Janine,

Lain lai’g paagi ang tawo pagpadayag sa ilang gibati. Maayo na lang dili siya manapat kun mag-away mo, wala’y katarungan ang pisikal nga abuso. Pero ang insulto ug pagpakauwaw usa sab ka matang sa abuso. Apan mora’g wala kay isyu sa iyang mga pulong, naa sa iyang tono ug kasaba ang imong reklamo.

Maski unsa pa siya kasaba magyawyaw, lagmit wala na siya makamatikod niini tungod kay naanad na siya. Usahay baya dili ta makapaminaw sa atong kaugalingon. Busa sa sunod niya’g yawyaw, sikretoha’g record iyang tingog. Ini’g hupas sa iyang kalagot, ipapaminaw kaniya iyang kaugalingon nga tingog. Basin diha siya makaamgo unsa siya kasaba.

Kun dili matandog, mahimo ka mobiya ini’g saka sa iyang tingog. Kun gisabaan ka, lakaw palayo niya. Balik lang kun peace time na, matud pa. Ayaw’g agwanta sa iyang kasaba, makalakaw man kaha ka’g makadagan. Kun masuko kay nipalayo ka, ingna ang iyang tono dili makasulbad sa inyong giawayan. Klaroha nga diha lang ka makig-istorya kun kalmado siya.

Posible moingon pasagdi lang gud siya magyawyaw. Ingna mao gani nga mopalayo ka aron mapasagdan siya. Pero lagmit mo-insistir siya nga maminaw lang ka, pahinumdomi nga uyab ka niya, dili saop o katabang nga kaniya dili makapakgang. Kun dili gyud mausab ug di ka makaagwanta, angay na ka magduha-duha. Sa relasyon angay ka magmalinawon.  Tito Miguel

Magpatambag ka? Ipada kang Tito Miguel: 0991-318-9366