CAVITE , Philippines — Dalawa ang sugatan habang tumilapon ang kabaong na may lamang patay na nakatakda na sanang ilibing nang araruhin ng isang 14-wheeler truck a kahabaan ng Governors Drive sa Brgy. Sampaloc 4, Dasmariñas City kamakalawa ng hapon.
Inoobserbahan sa pagamutan ang dalawang biktima na magkaangkas sa motorsiklo na sina Baryl Cruz, 34, driver, residente ng Sto Cristo, Dasmariñas City at ang angkas nitong si alyas “Jho”.
Sa ulat ng pulisya, alas-5:10 ng hapon habang convoy ang mga sasakyan ng mga makikipaglibing at ang karo o funeral car lulan ng Toyota Hilux at minamaneho ni Roland Camaganacan, 53, lulan ang kabaong may lamang patay na nakatakdang ilibing sa kalapit na sementeryo sa nasabing lugar.
Galing umano sa loob ng isang subdibisyon ang karo at convoy nangbiglang rumagasa ang isang Isuzu Truck (PSU 357) na nakarehistro sa Starcrete Mfg Corp at minamaneho ng driver na si Jerome Russel, 35, ng Navotas City.
Natumbok umano ng truck mismo ang karo ng patay dahilan upang tumilapon ang kabaong. Wasak ang karo na sumabit pa sa unahan ng truck.
Nadamay naman ang isang motorsiklong Honda MC (721 OPC) kung saan sakay ang dalawang nabanggit na biktimang sugatan.
Napag-alaman na hindi nakayanan ng preno ng trak dahilan na rin sa pakurba at pababa ang kalsada.
Hawak na ng pulisya ang driver ng trak na sasampahan ng kaukulang kaso.