CEBU, Philippines — Si Tyrese Maxey mi-iskor og 10 sa iyang 45 puntos sa overtime aron agakon ang Philadelphia 76ers ngadto sa una nilang daog ning lab-as nga NBA season pinaagi sa 118-114 nga desisyon batok sa Indiana Pacers kagahapon didto sa Gainbridge Fieldhouse sa Indianapolis, Indiana.
Ang Sixers nanglimbasog sa nag-una nilang duha ka duwa gumikan kay wala ang duha nila ka mga bitoon nga sila si Joel Embiid ug Paul George nga padayon pang nagpa-alim sa ilang mga angol.
Apan si Maxey mipakita og igong katakos aron aswaton ang iyang koponan ngadto sa kadaogan. Mibubo siya og 14 puntos sa katapusang kuwarter ug dayon milansang og 3-pointer pagsugod sa dugang singko minutos sa aksiyon nga nakapalabaw sa Sixers sa hingpit.
Si Caleb Martin midugang og 17 putnos ug 12 ka rebounds, si Kelly Oubre mihipos og 14 puntos ug walo ka rebounds samtang si Andre Drummond mitali og nuybe puntos ug 17 ka rebounds alang sa Sixers.
Sa laing bahin, ang Portland Trail Blazers ug Brooklyn Nets mirehistro sab sa una nilang daog.
Sila si Jerami Grant ug Anfernee Simons nagkumboya'g 55 puntos sa dihang gibalhiboan sa Portland ang New Orleans Pelicans, 125-103, samtang sila si Cam Thomas ug Dennis Schroder nagkumbinar og 61 puntos aron ituboy ang Brooklyn ngadto sa 115-102 nga pagpaluhod sa Milwaukee Bucks.
Wala sab magpabitin si Shai Gilgeous-Alexander nga mipupo og 35 puntos, 11 ka rebounds ug siyam ka assists sa dihang gipasukarap sa Oklahoma City Thunder ang Atlanta Hawks, 128-104, alang sa ikatulo nilang sagunson nga daog.
Dako sab og naambag sila si Chet Holmgren ug Jalen Williams nga nakatigum og 45 puntos alang sa Thunder.
Didto sa Golden State, si James Harden miwadwad og 23 puntos ug 11 ka assists samtang si Ivica Zubac mitimbre og 23 puntos ug 17 ka rebounds sa dihang gipayaka sa Los Angeles Clippers ang Warriors, 112-104. Ang alas sa Warriors nga si Stephen Curry mibiya sa duwa sa katapusang kuwarter tungod kay nayayay ang wala niining tiil. (BANAT NEWS)