Uyab nga palahubog

Dear Tito Miguel,

Maayong adlaw, ako diay si Hope, taga Minglanilla, Cebu. Nagoul ko sa akong uyab nga si  NJ, kay bisan unsaon nako og badlong, dili gyud moundang sa iyang pagka-palahubog.   Grabe kaayo kun mahubog, kay mogawas gyud ang pagka-hambugero. Ako bitaw ang maulaw sa iyang pagka-palahubog. Usahay, matulog sa lamesa, mag-apong intawn ko.  Kapila nami naglalis tungod sa iyang pagka-palahubog. Nagplano ko nga ako siya nga buwagan. Sakto ra ba ang akong hukom? Or naa kay matambag alang sa posibleng buhaton nako aron mausab  si NJ? Daghang Salamat. - Hope -

* * *

Hope,

Dili ba kaha siya alcoholic? Kun mao, maglisod gyud ka’g pugong o paundang niya ka’y na-addict na iyang lawas. Busa, kinahanglan na siya’g professional nga tabang. Pero kun dili pa siya alcoholic, ganahan ug mahilig lang gyud moinom, maski unsaon nimo dili pabadlong, pasagdi.

Ayaw pag-apong. Pasagdi siya kun malipong. Total, gibuhat na nimo ang tanang pasabot apan sa maong bisyo dili gihapon siya maibot. Ayaw’g kuyog nga mag-inom siya, aron dili nimo makita iyang pang-hinambog ug pagmaoy. Dako na man siya, dili sad ka niya inahan o ginikanan.

Apan kung gusto ka makaamgo siya unsa siya kakatag inigkahubog, i-video sa tago samtang siya hubog ug nanghinambog. Ipakita ini’ng kahuwasan niya. Ka’y lagmit wala siya’y nakitang dautan sa iyang binuhatan, busa nganong usbon man.

Paniid sa iyang reaksyon, kun maulaw ug mag-usab, maayo. Kun dili, angay na ka magduha duha kun ganahan ug andam ba ka mopadayon inubanan sa bisyo niya. Ka’y unta ang kawad-on ra sa gugma ang maoy bug-at nga rason aron mobiya ka sa relasyon. Apan kinahanglan deserving siya. Kun dili, palayo na, kay lagmit masunog ka sa kayo.

Hinuon, kanang bisyo mohupas ra na inig paningil sa lawas, kun siya magkasakit o matiguwang na. Apan hangtud kanus-a man ka magpaabot? Basin mag-usik lang ka sa panahon ug higayon. Biya na, apan kun pugngan ka’g mopasalig nga mag-usab na, ayaw’g too dayon, paniid usa. Ayaw og salig sa pulong, lihok ang pasulti-on.  -Tito Miguel-

Magpatambag ka? Ipada kang Tito Miguel: 0991-318-9366