Mataas ang expectation sa My Love Will Make You Disappear nina Kim Chiu and Paulo Avelino. Lalo na at top trending at pinag-usapan ang espesyal na announcement nila tungkol sa unang pelikula na kanilang pagsasamahan sa ilalim ng ABS-CBN Star Cinema na romance-comedy film.
“Dahil nadala na namin kayo sa TV, sa tour, ngayon sasabihin na namin, may isang malaking regalo kami ni Paulo sa inyo kasama ang Star Cinema ang My Love Will Make You Disappear,” sabi ni Kim sa announcement sa It’s Showtime noong Lunes (Agosto 12).
Ibinahagi ng direktor ng pelikula na si Chad Vidanes na kakaiba umanong romcom ang naturang pelikula at ipapakita kung paano tayo nagiging “wild and fun” dahil sa magic of love.
“Pre-pandemic pa ata ‘yung huli tayong nagkaroon ng true blue romcom from Star Cinema. Kaya ngayong taon, magiging part tayo [nito]. Nakaka-excite dahil sa inyo,” sabi naman ng direktor na si Chad Vidanes.
Kakaiba raw na KimPau nga ang dapat abangan matapos silang magtambal at minahal ng publiko sa hit series na Linlang at What’s Wrong With Secretary Kim. Ito rin ang nagsisilbing pagbabalik nina Kim at Paulo sa ABS-CBN Films pagkatapos ng apat na taon.