Napugos og ipon sa uyab
Dear Tito Miguel ,
Ako diay si Robert John, taga Brgy. Sapangdaku, Cebu City. Ganahan nako makigbuwag sa akong kapuyo nga si Girly kay bisan unsaon nako og badlong, wala gyud mausab ang ngil-ad niya nga batasan. Sa tinud-anay lang,nahinaykan ra gyud ang pakig-ipon nako niya tungod kay nakaanak mi. Kun makabuhi ko sa among sitwasyon , andam ra gyud ko mopadayon og sustento sa among anak. Sa higayon nga makigbuwag ko, dili gyud siya mosugot . Unsaon mani nako pag-ikyas niining sitwasyona? —Robert John
* * *
Robert John,
Hunahunaa kuno’g tarong kun gusto ba gyud ka mobiya. Pila ra may paglakaw sa way panamilit kun desidido gyud ka makigbuwag. Basin gisamokan lang ka sa iyang batasan apan maagwanta pa. Basin pareha ra ka’g inahan nga gisamokan sa kakulit sa iyang mga bata apan mingawon sa kasamok ug kakatag kun sila magpuyo, matulog, molakaw o mo-eskuyla.
Dili man kaha mosugot kun makigbuwag ka, ayaw ipaagi sa pulong, sibat na dayon. Kay kun magpabilin ra diay ka tungod lamang kay gipugngan ka, basin di gyud ka gusto mobiya. Basin mahilis dayon ka ini’g pangamuyo niya’g pasalig nga mag-usab.
Pero dako og purohan nga mahadlok ka ihikaw niya inyong anak, basin dili na nimo makita. Lagmit buhaton na, apan mahimo nimo ipangusog imong katungod, labi na’g mangayo na’g sustento. Karon kun iya gyud ipalayo inyong anak gikan kanimo, duna may mga legal nga lakang aron ka mahataga’g katungod pagbisita ug pakigkita.
Kana imong ingon nga nahinaykan ra ka’g pakig-ipon, posible tinuod. Apan ang labing tinuod, nakagusto gihapon ka niya. Kay kun di gyud ka ganahan niya nga giluod na ka, dili ka makaako’g pakigpuyo. Apan kay nakig-ipon man ka maski kunohay supak sa imong kabubut-on, duna gihapon kay gusto. Posible dili ing ana ka dako, apan insakto ra nga makaako ka’g dulog ug pakig-ipon niya. Pero’g sigurado na ka mobiya, gamita imong mga tiil, ayaw ang baba. Gusto ka makalingkawas? Gawas. —Tito Miguel
Magpatambag ka? Ipada kang Tito Miguel: 0991-318-9366
- Latest
