Bisita sa birthday party ni Barbie

CEBU, Philippines — Usa ang Kapamilya actor nga si Richard Gutierrez  sa mga bisita sa  26th birthday party ni Barbie Imperial sa niaging gabii.

Kauban  ni Richard ang iyang inahan nga si Annabelle Rama.

Una nga na-link ang pangalan ni Richard ngadto kang Barbie ug pabilin gihapon nga tak-om ang duha kampo kalabot sa maong chika.

Mother Lily mipanaw

Nipanaw kagahapon ang 85 anyos nga long-time matriarch sa Regal Entertainment nga si  Mother Lily Monteverde,  unom ka adlaw human nipanaw ang iyang bana nga si Remy Monteverde.

Ang anak  niya nga si UP Fighting Maroons head coach Goldwin Monteverde ang nikumpirmar sa maong balita ngadto sa  GMA News Online.

Si  'Mother Lily'   ang nagpaluyo sa sikat nga mga  pelikula nga sama sa  'Mano Po', 'Shake, Rattle & Roll', 'Sister Stella L' ug uban pa.

Sa pagsuwat niining balitaa, wala pa  mahisgoti ang sakit nga namatyan sa sikat nga film producer.

Pipila ka mga personalidad ang nipadangat sa ilang pahasubo ngadto sa pamilya ni Mother Lily  .

"The Queen is dead. Long live the Queen. Paalam, Mother Lily," nagkanayon ang direktor nga si  Lore Reyes .

Si Reyes maoy usa sa mga karaan nga direktor kaniadto sa pipila ka  "Shake, Rattle & Roll" films.

Nagbangotan usab si Sen. Grace Poe sa kamatayon ni Mother Lily  nga  iyang "ninang".

"I’m so sorry and sad to hear about Mother Lily’s passing. My Ninang Mother always believed in me and assured me whenever I doubted myself. She has helped so many and she will never be forgotten. She was, and will always be, a Titan in the Philippine movie industry. Our deepest sympathies and condolences to her family and loved ones,"  Facebook post sa senador.

Unahon ang kasal

Nakadawat og mga pangutana si Kiray Celis gikan sa iyang fans  kun kanus-a niya  target nga makabaton og anak.

Apan gitataw sa komedyanteng aktres nga sa dili pa sudlan ang maong butang,  mag-una ang kasal nila sa iyang boyfriend nga si Steojan Estopia.

Wala pa hinoun maghisgot si Kiray kun kanus-a nila plano sa iyang boyfriend nga magpakasal.

Nagkanayon ang aktres nga kasamtangan niya nga gipahimuslan ang maayo nga dagan sa iyang showbiz career.

Sweet gihapon

Bisan didto sa Amerika, nasigpatan gihapon ang ka-sweet nila ni  Paulo Avelino ug Kim Chiu  Taod-taod na nga gidungog nga duna sila'y tinagoang relasyon  gumikan sa ilang ka-sweet luyo sa kamera. Gikilig og maayo niini ang KimPau fans.

Bilib kang Marian

Mibilib og maayo si John Arcilla kang  Marian Rivera gumikan sa ka maayo moarte niini sa  pelikulang “Balota". "It is indeed a gesture of giving back to the industry where she found her passion. Salute to @marianrivera and God Bless you more! I will definitely watch this Film,” Instagram post sa award-winning actor.

Malipayon sa pagka-single

Gipasigarbo ni  Ashley Ortega  ang iyang pagka-single ug gi-enjoy niya ang paghigugma sa iyang kaugalingon.  Dili pa siya andam nga mosulod og balik sa usa ka re relasyon."Happily single pa rin. I am genuinely happy pa rin sa career path ko," saysay pa ni Ashley sa interview niini sa "Fast Talk with Boy Abunda".

Atasha mitingog na sa isyu nila ni Mayor Vico

Gikakugang ni Atasha Mulach ang nikatap nga taho nga matud pa mabdos siya ug si Pasig City Mayor Vico Sotto  ang amahan sa gisabak niini.

Sa interview ni  Atasha kang Ogie Diaz, hugtanong gihimakak niini ang maong  taho.

Laing intriga nga gibato kaniya kay matud pa andam siya pakaslan ni Mayor Vico.

Nagkanayon si Atasha nga gikahibulong niya ang maong intriga ilabi na nga wala pa gyud sila nagkakita ni Mayor Vico sa personal bisan kausa.

Gitambagan si Atasha sa iyang fans nga ikiha ang mga responsable sa maong fake news.

Andrea nataypan ni Itan

Nagsagunson ang mga proyekto  ni Itan Rosales sa Vivamax busa nailhan na kini og maayo sa publiko. Giangkon sa aktor nga crush niya ang Kapamilya actress nga si Andrea Brillantes.

Gipangandoy niya nga  unta makatrabaho si Andrea. Miyembro si Itan sa  all-male sing and dance group nga VMX V.