Basta Cebuana, lig-on gyud
CEBU, Philippines — Salig lang sa kaugalingon inubanan sa lapad nga paningkamot maoy taytayan sa Cebuana beauty queen nga si Maria Gigante sa pagkab-ot sa naangkon niya nga kalamposan sa iyang kinabuhi.
Na-busy si Maria sa pagbisita sa nagkadaiyang lugar sa Sugbo kun diin gipasalamatan niya ang tanang nisuporta kaniya sa labing ulahi nga prestihiyosong indigay nga iyang gisalmotan.
Kahinumdoman nga si Maria maoy nakaangkon sa international title nga Universal Woman 2024 nga gipahigayon sa Cambodia sa niaging buwan.
Atol sa presscon nga gipahigayon sa Belmont Hotel Mactan, gitataw niya nga ang suporta sa katawhan maoy nagsilbi niya nga inspirasyon o naghatag kaniya og igong kusog sa pagtungtong sa international stage.
Pinaagi sa titulo nga iyang naangkon , magpadayon ang pagkaaktibo niya sa mga programa nga maghatag og proteksyon sa kababayenhan ug kabataan nga maoy nag-unang tingoha sa Universal Woman Organization.
Nagikan si Maria sa Bantayan Island, Cebu, ug siya ang gitudlo isip representante sa Pilipinas alang sa ikaduhang edisyon sa Universal Woman pinaagi sa ALV Talent Circuit ni Arnold Vegafria.
Tungod sa subsob nga preparasyon, naangkon gyud niya ang kadaogan sa maong prestihiyosong indigay.
Gipamatud-an ni Maria ang naandan na nga obserbasyon sa kadaghanan nga dili gyud basta-basta ang mga Sugbuanon kun maghisgot og indigay sa kaanyag.
- Latest
