Nakuha sa pambato sa Pilipinas nga si Yllana Aduana ang titulo nga Miss Earth Air. Ang 23rd edition sa Miss Earth kay nahitabo niadtong Biyernes didto sa Vietnam. Ang representante sa Albania nga si Drita Ziri maoy gikoronahan nga Miss Earth 2023.
American citizen
Gamay na lang gyud ang kulang aron mahimong American citizen ang singer nga si Rachel Alejandro. Aduna na siya'y schedule sa interview alang sa maong katuyoan. Duha ka dekada na nga nagbase si Rachel sa Amerika.
"Mallari" gikahinaman
Gipasigarbo ni Piolo Pascual ang pelikula niya nga "Mallari" gumikan kay dili basta-basta ang nagkadaiyang hugna sa mga eksena niini nga angayang atngan sa moviegers.
Atol sa presscon conference nga gipahigayon sa Citadines Hotel dinhi sa Dakbayan sa Sugbo sa niaging adlaw , gibutyag ni Piolo nga ang "Mallari" kay naghisgot sa tinoud nga panghitabo kalabot sa labing una nga 'documented serial killer ' sa Pilipinas.
Nagmalampuson ang pakighimamat ni Piolo sa iyang Cebuano fans kauban sila si Janella Salvador, Ron Angeles ug ang executive producer sa pelikula nga John Bryan Diamante. Gihimo ang motorkada nga gisundan dayon sa mall show nga gipahigayon sa SM City Cebu.
Ang Mentorque Productions maoy nagpaluyo sa maong pelikula ug mao usab kini ang labing una nga Pinoy mainstream movie nga gi-distribute sa Warner Bros.
Ipasalida kini sa mga sinehan karong Disyembre 25 isip kabahin sa Metro Manila Film Festival 2023.
Nanawagan si Piolo sa katawhan nga gawas sa Mallari, labing maayo nga suportahan ang tanang entries sa MMFF karon tuiga alang sa kaayohan sa movie industry sa nasud.
Nananghid sa mama
Gibutyag ni Sharon Cuneta nga saulogon sa iyang anak nga si KC Concepcion ang Pasko kauban ang amahan niini nga si Gabby Concepcion. Suma pa sa Mega Star nga nananghid gyud kaniya si KC kalabot sa maong butang.