"Last Dance" sa USC-North Alumni mosikad na

CEBU, Philippines —  Ang "Last Dance" sa University of San Carlos-North Alumni Basketball Club (USC-NABC) nga giulohan og Cong. Bingo Bagtik Matugas Cup mo-arangkada na karong adlawa didto sa USC North Campus gym sa may General Maxilom Avenue, dakbayan sa Sugbo.

Sa dili pa ang mga duwa, usa ka simpleng seremonyas sa pagbukas ang ipahigayon sa ala-1:30 sa hapon nga pagatambongan nilang Surigao del Norte Rep. Francisco Jose “Bingo” F. Matugas II ug Rev. Fr. Rogelio N. Bag-ao, SVD, ang Provincial Superior sa SVD-Philippines Southern Province.

Sa kinatibuk-an, 30 ka teams nga gibahin sa upat ka dibisyon ang mopakita'g aksiyon sa torneyo nga gipasiugdahan sa USC North Alumni Affairs nga gipangulohan sa presidente nilang si Ryan Villaflores.

Kabahin sab sa organizing committee sila si Lolito Belonguel (VP Internal), Ernest Evangelista (VP External), Kevin Laurel (treasurer), Joshua Mah (secretary), Ian Callet (PRO/ballclub head), Galimar Largo (school coordinator), ug Jonathan Saso (commissioner).

Ang Division 1 gilangkoban og mga players gikan sa Batch 1982 ngadto sa 1995, ang Division 2 gikan sa Batch 1996 ngadto sa 2003, ang Division 3 gikan sa Batch 2004 ngadto sa 2010, ug Division 4 gikan sa Batch 2011 ngadto sa 2018.

Moduwa sila og single round robin format. Ang top 2 qualifiers matag dibisyon adunay  twice-to-beat advantage sa crossover semifinals. Ang mga mananaog mag-abot sa best-of-three finals.