CEBU, Philippines — Nasayud sa importansiya sa grassroots development pagdiskubre og mga talento, ang lungsod sa Madridejos didto sa isla sa Bantayan mihatag og oportunidad sa mga bata nilang basketbolista nga ipasundayag ang ilang abilidad pinaagi sa duha ka mga exhibition games sa ilang sports and cultural center ning bag-ohay pa lamang.
Gilangkoban og mga magduduwa gikan sa Madridejos ug Santa Fe sa Under 17 ug Under 11 age groups, ang mahinungdanong kalihukan kabahin sa 2nd Mayor Romeo Villaceran Basketball Cup 2023, nga usa sa mga naghatag og kinabuhi sa tinuig nga selebrasyon sa pista sa mga Lawisanon agi'g patamod sa minahal nilang patrona, ang Inmaculada Concepcion, karong umaabot nga Disiembre 8. "These activities not only keep our kids away from gadgets and bad vices but also enable them to know more about the fundamentals of playing hoops and along the way enhance their ability. They are willing and very determined to learn that is why we are helping them," matud pa ni Madridejos councilor Owen Daruca.
Nakakuha og hugot nga suporta gikan nilang mayor Romeo Villaceran ug vice mayor Vincent "VYV" Villacrusis, si Daruca mihimo ning maong aktibidad isip buena mano nilang dalit sa mas komprehhensibo nilang programa nga mosikad na sunod bulan. "A first in the island, this training camp is actually going on already. It will formally start in our town on December 16 until December 31 but it will continue from January to March next year during weekends only," dugang pa ni Daruca. Mopadagan sa dalaygon nilang proyekto mao si Michael Castro Etrata, usa ka All-Star guard ug four-time champion uban sa University of the Visayas (UV) Green Lancers atol sa mabulokon niyang panahon sa Cebu Schools Athletic Foundation, Inc. (CESAFI) duha ka dekada na ang milabay. "First, I would like to extend my profound gratitude to SB Member Owen Daruca for the overwhelming support we've received for our basketball clinic and for the opportunity to showcase the acquired skills of the participating kids. Special thanks also to Mayor Romeo Villaceran, Vice Mayor VYV, and the LGU of Madridejos for allowing us to be part of their events in celebration of their upcoming town fiesta," dason pa ni Etrata. "I would also like to express my sincere appreciation to Santa Fe Mayor Ithamar Espinosa, Vice Mayor Mary Greleigh Cabrera and Barangay Captain Romeo Batiancila. Their collective support has played an important role in the success of our program," dugang pa ni Etrata, nga nakadaog og upat ka sagunson nga titulo sa CESAFI uban sa UV Lancers ubos sa paggiya ni coach Elmer "Boy" Cabahug gikan sa labing unang season sa liga niadtong 2001 ngadto sa 2004.
Si Etrata, lumad gikan sa Polomolok, South Cotabato, usa sab ka dekalibreng commercial player nga nakasul-ot og pipila ka uniporme uban sa Guardo Shiatsu, Skygo Motors, Happy Toothpaste, Montaña Pawnshop, ug Duterte Aguilas. Gikoronahan siyang MVP sa dihang ang North Cotabato Braves nakampiyon sa National Basketball Conference (NBC) niadtong 2006. "I am driven by my unwavering passion for the sport. I am dedicated to creating a learning platform where participants can gain a comprehensive understanding of basketball through the sharing of my knowledge and skills," paambit pa ni Etrata.
"The goal is to foster skills development, teamwork, and a deeper appreciation for the game among the participants and ultimately contributing to their growth as athletes and enthusiasts," panapos ni Etrata.