Dear Tito Miguel ,
Ako diay si Andrea , taga Barangay Labangon,Cebu City . Walo ka tuig na diay mi sa akong uyab nga si Vincent nga taga Barangay Sapangdaku ,Cebu City. Imbes malipay ko kay nagdugay mi, nakulbaan naman hinoun ko . Kay kasagaran sa akong nabantayan kay magbuwag gyud ang mag-uyab kun moabot na og 7 years pataas . Dili man ko mahimutang Tito Miguel uy. Okay ra baya ang dagan sa among relasyon. Unsa akong buhaton , para mawala ang daotan nako nga huna-huna? — Andrea
* * *
Andrea,
Ayaw’g kabalaka sa mga butang ug hitabo nga dili nimo kontrolado, sama sa pag-usab sa inyong sitwasyon o sa imong uyab mismo. Posible mohupas iyang gana ug gugma kanimo o dili ba kaha makakita siya’g lain. Dili ni nimo matag-an. Kun mahitabo man, dili sab nimo mapugngan. Inay nga magsige ka’g hunahuna unsa’y mahitabo ninyo, tagamtama ang unsa’y naa ninyo karon. Kun sige ka’g kaguol, tabla ra nga imong gihikawa’g kalinaw ug kalipay inyong relasyon. Tinuod, kasagaran manag-uyab magbuwag ini’g tungtong sa pito ka tuig. Mao kini ang gitawag nga 7-year itch. Kasagaran, pero dili sa tanan.
Kun kini mahitabo kaninyo, buot pasabot dili kamo ang para sa usa’g usa. Ka’y kun kamo pa, molapas gyud mo’g pito ka tuig, posible pa magdayon mo, kamatayon ra’y makapabuwag ninyo. Apan ang relasyon sugal, dili nimo matag-an unsa’y sunod mahitabo, kun ikaw magmalamposon o sa kataposan magmasulob-on. Busa, ipadayon ang unsa’y nakapadugay kaninyo. Pero sagoli’g bag-o, sama sa pag-travel o pagdiskubre sa uban nga ganahan ninyo buhaton , o dili ba kaha ang paghatag sa igo’ng panahon para sa tagsa-tagsa, aron dili sum-ol.
Matud pa, ayaw’g mahay sa nangagi kay dili na mausab, ayaw’g kaguol sa ugma kay wala pa moabot, tagamtama ang karon ka’y mao na’y gasa kaninyo sa panahon nga dili na mobalik pa. Ayaw na’g hunahuna sa dautan nga mahitabo. Ka’y dili lagi matag-an ug mapugngan. Gani, posible pa ikaw mismo mao’y hinungdan nga mahitabo ang imong gikahadlokan. —Tito Miguel
Magpatambag ka? Ipada kang Tito Miguel: 0991-318-9366