Bernadette, sinayaw ang viral Mini Miss U dance challenge

MANILA, Philippines — Makiki-Mini Miss U na rin si Bernadette Sembrano kasama ang grand winner ng Mini Miss U ng It’s Showtime na si Arianah Kelsey Lasam sa Tao Po ngayong Linggo (Nobyembre 12).

Madidiskubre rin ni Bernadette ang dahilan kung bakit pinakahihintay na biyaya si Arianah Kelsey ng kanyang mga magulang. Ibabahagi rin ng mga magulang ni Arianah kung paano nila pinalaki ang kanilang anak bilang isang “bibo girl” na nagbigay-daan upang makuha nito ang korona bilang Mini Miss U.

Aalalahanin naman ni Kapamilya reporter Dyan Castillejo at iba pang mga manlalaro mula sa Philippine Tennis Academy ang buhay ng yumaong junior tennis coach na si Jun Toledo. Naging guro si Jun, na isang manlalaro rin ng tennis, ng maraming kabataang atleta na nagtagumpay sa mundo ng tennis bago siya tamaan ng kanser.

Samantala, makikilala ni Kabayan Noli De Castro si Samuel Mercader sa kanyang dairy farm sa Nueva Ecija. Si Samuel ay umabot lamang sa ikalawang baitang sa paaralan kaya napilitan siyang magtrabaho sa bukid, ngunit sa pamamagitan ng masikhay na pagtatrabaho, may-ari na siya ng isang dairy farm na may higit sa dalawampung baka.