First time nga nisalmot og indigay, apan nidretso dayon sa international pageant stage .
Kini maoy kapalaran ni Sheila Patana Mananquil kinsa pambato sa Pilipinas alang sa umaabot nga Miss Icon World 2023 nga pagahimoon sa Mumbai, India sa May 7.
Suma pa ni Sheila nga todo gyud ang iyang pagpangandam sa maong international pageant ug ipamatuod gyud niya nga dunay siya'y igong katakos niini.
"I want to inspire young people nga dili gyud mo- give up sa pag-achieve sa inyong dreams ," matud pa ni Sheila atol sa paglusad sa Queen Gwaps Beauty Products nga gipahigayon didto sa Iconique Mall Colon.
Bisan bag-o pa lang siya sa kalibotan sa indigay, medyo naanad napud siya pagtungtong sa entablado sanglit nagdako siya sa pag-perform atubangan sa daghang tawo isip dancer ug singer kauban ang iyang mga igsuon.
Ipamatuod ni Sheila nga ang usa ka beauty queen dili lang kutob sa pisikal nga hitsura,kundi lakip napud ang kasing-kasing niini sa pagtabang sa ubang tawo.
Usa pud sa nag-abag kaniya mao ang #RapidMind by Ryan Mark isip pagpangandam alang pagsagubang niya sa Q&A.
Nagkanayon si Sheila nga grabe pud ang paghatag og suporta kaniya ang iyang pamilya ilabi na sa iyang inahan nga si Mrs. Tourism Ambassador Universe 2022 Aida Patana nga mao pud ang nagdumala sa Queen Gwaps Beauty Products.
Mapasalamaton kaayo si Miss Aida ngadto kang Senyorito Michel Lhuillier gumikan usab sa paghatag og suporta niini sa pagsalmot sa iyang anak sa Miss Icon World 2023.
Si Aida usab ang national director sa Icon World pageant ug nitataw nga wala siya nagduha -duha sa pagpili ni Sheila nga mahimong pambato sa nasud alang sa maong indigay sanglit nakita gyud niya ang potensyal niini.
Gani nagtangag usab kini sa susamang hiyas nga iyang gipasigarbo, ang kanunay nga pagtabang sa mga tawo.
Kanunay gyud niya nga gitambagan si Sheila ug uban niya nga anak nga dili wad-on ang batasan niini nga motabang sa isigkatawo bisan pa man sa ginagmay nga paagi , ang labing importante nga kinasing-kasing kini.
Sama sab kini sa iyang pag-umol sa Gwaps Beauty Products.
" Usa ni ka mission , ang makatabang sa mga tawo nga duna sila'y ma-earn, " matud pa ni Miss Aida.