Jamie Rivera, bossing ng bagong tatag na inspire music label
May kapana-panabik na papel na gagampanan si Jamie Rivera bilang head at creative consultant ng Inspire Music, ang bagong record label ng ABS-CBN Music at una nitong handog ang awiting 3 in 1 na ilulunsad na ngayong Biyernes (Marso 31). Isang upbeat song ang 3 in 1 na may reggae vibe at tungkol sa ligayang nararamdaman sa pagtitiwala sa Holy Trinity, o ang Diyos Ama, Anak, at Espiritu Santo.
“The song is perfect for anyone looking for something fun and new this summer to dance to, or even for use when people gather to celebrate and pray together,” ayon sa Inspirational Diva na siya ring sumulat ng kanta.
Kasama rin bilang featured artists ang mga batang sina Imogen at The Voice Kids season 5 contestant Fabio Santos sa napapanahong awitin.
“Ang gagaling nung mga bata and they were able to give justice to the song. We collaborated with them so that more children will relate to ‘3 in 1,’” ani Jamie.
Ito bale ang kauna-unahang kanta na iprinodyus sa ilalim ng Inspire Music, ang ABS-CBN Music label na tututok sa paggawa ng mga inspirational music para maghatid ng pag-asa at malasakit sa mga makikinig.
Paliwanag ni Jamie, “Inspire Music is about inspiring people from all walks of life – to be inspired by the melody, by the lyrics, by the music.”
Bukod sa pagtutok sa music production, gagabayan din ni Jamie ang iba’t ibang artists na nakatakdang mag-record ng musika sa ilalim ng bagong label.
Si Jamie ang nasa likod ng iba’t ibang sumikat na inspirational at makasaysayang kanta, katulad ng Heal Our Land, Jubilee Song, Only Selfless Love, Tell the World of His Love, at We Are All God’s Children.
Ang tanyag na mang-aawit din ang nagbigay-buhay sa official mission song na We Give Our Yes ng 500 Years of Christianity celebration sa bansa noong 2021.
Samantala, kung meron mang gustong maka-collab si Jamie ‘yun ay ang P-Pop group na BINI at BGYO. “I’m looking forward to work with the new ones. Naiintriga ako roon sa BGYO and BINI. Gusto ko silang makatrabaho kasi may dance sila eh,” pag-amin ng Inspirational Diva.
- Latest
