Jalosjos, MR. M at GMA execs, inaayos na ang ibang artist na papasok sa EB?!

Hindi pa naman daw regular si Alden Richards sa Eat Bulaga, sabi sa amin ng taga-Sparkle na nagha-handle sa Asia’s Multimedia Star.

Nakakatuwa lang panoorin sa opening number na magkakasama ang buong Dabarkads at bandang huli ay pumasok na sina Tito, Vic Sotto and Joey de Leon.

Sabi naman ng mga taga-Sparkle, hindi naman daw araw-araw mapapanood sa Eat Bulaga si Alden. Basta may available na araw lang daw.

So far, wala pa ring katiyakan kung tuluy-tuloy pa rin ang Dabarkads ngayong hindi na si Mr. Tony Tuviera ang namamahala.

Ilang Dabarkads din ang kinulit namin para hingan sana ng pahayag, pero ayaw pa talaga nila.

Wala pa rin naman daw kasi silang masabi kung ano ang magiging kalagayan nila sa naturang noontime show.

Pero ang latest na naririnig namin, nakikipag-usap na raw si Mr. Romy Jalosjos sa taga-GMA 7, pati kay Mr. Johnny Manahan para sa possible Sparkle artists na magiging bahagi ng Eat Bulaga.

Hindi pa rin masasabi kung sino ang maiiwan sa Dabarkads o meron bang matatanggal.

Naghihintay lang daw ang TVJ kung ano ang iaalok sa kanila ng bagong management ni dating Congressman Romy Jalosjos.

Samantala, tikom din ang bibig ni Mr. Tuviera o kahit ang ilang taong malapit sa kanya.

Ilan sa mga kasamahan namin ang nangungulit kina Mr. T, pero wala pa raw silang sagot sa ngayon.

Mas mabuting hintayin na lang daw ang kanilang official announcement.

Samantala, sa segment na Bawal Judgmental kahapon ay naintriga na naman ang mga sumusubaybay sa natural ng noontime show sa linya ni Joey de Leon. Mga scholar ang choices sa naturang segment at may hirit si Tito Joey sa kanila na ang sabi: “basta tandaan n’yo lang, hangga’t may bata, may Eat Bulaga. Hangga’t may Eat Bulaga, merong mga katulad n’yo. Sana huwag mawala ang Eat Bulaga.”

Pinuri nila ni Vic Sotto ang mga scholar ng Eat Bulaga na nagtagumpay sa napili nilang propesyon.

Sabi naman ni Bossing Vic: “proud kami sa inyo, tapos gaganunin n’yo lang.”

Iba ang dating nito sa mga taong nakatutok sa kontrobersyang hinaharap ngayon ng Eat Bulaga.

Mala-DongYaN Ruru at Bianca, sa kasal na ang tuloy?!

Matagal na namin nabalitaang nagpa-convert na si Bianca Umali sa Iglesia ni Cristo, pero ipinakiusap sa aming huwag na lang isulat at baka mabigla raw ang lola niya.

Pero nung nakatsikahan namin si Ruru Madrid sa renewal niya sa Beautederm, sinabi niyang nagpaalam daw pala sila ni Bianca bago itinuloy ng Kapuso actress na magpadoktrina. “Actually, dalawa po kaming nagpaalam sa lola niya.

“At first, natakot kami na baka mamaya hindi pumayag, pero nagulat kami na sobrang open din ni Mama Vicky sa sinabi ni Bianca.

“Sobrang na-touch ako. Pinagpanata ko ‘yun. Every night, pinagpi-pray ko ‘yun,” kuwento ni Ruru.

Nilinaw na rin ni Ruru na hindi naman daw dahil sa kanya naging INC si Bianca. Hindi naman daw niya pinilit ang nobya kundi ‘yun at talagang kusa niyang maging miyembro ng INC.

“Siguro, marami ring misconception na mga tao na parang pakiramdam nila, ang ginawa ni Bianca ‘yung pag-convert sa INC just because of me. Pero, siguro naging instrumento ako,” pakli ni Ruru.

“Birthday niya po ‘yun. Kaya sobrang na-touch ako. Hindi naman po para maging parte ng Iglesia hindi naman siya overnight lang e. It will take 8 months, bago ka ma-convert. Inaral n’ya po talaga ‘yun. So, I don’t  think just because of me kaya po niya ginawa ‘yun,” sabi pa ni Ruru.

Seryoso ang aktor sa mga pahayag niya pagdating sa relasyon nila ni Bianca.

Inamin niyang malaki na talaga ang pinagbago niya, dahil committed na siya sa aktres.

Magkasama sila ngayon sa bagong drama series ng GMA Public Affairs na The Write One.

Magsisimula na ito sa GMA Telebabad sa March 20, pero mauunang mag-stream ang VIU sa March 18.

Tanggap naman ng fans ang kanilang relasyon, kaya mukhang tuluy-tuloy na ito dahil may mga plano na sila sa kanilang future. Minahal sila ng fans, kaya puwedeng sila na ang susunod na Dingdong Dantes at Marian Rivera na natuloy sa kasalan.