Nasud sa mga tambok

Gibana-bana nga 27 milyones ka mga Pinoy ang makonsiderar nga sobra sa timbang o tambok segun sa survey nga gipahigayon sa Food and Nutrition Research Institute. Dakong baligho nga sa atong nasud diin nagkadaghan man kaha ang tambok, nauso na hinuon ang spandex ug skinny nga mga karsones. Makapahinumdum sa asawa nga gibati’g kasagmuyo samtang nagsud-ong sa iyang tambok nga pamayhon sa salamin. Busa mihangyo siya sa iyang bana nga komplimentohan siya’g mga pulong nga makadasig kaniya. Agi’g pagtamod, miingon ang bana nga, “Tin-aw pa ang imong panan-aw kay naklaro pa man nimo ang imong bayhon sa salamin.” Tua ra!

Abilidaran ang babaye

Matud ni Senador Villar ug Senador Hontiveros, daghan ang matampo sa mga kababayen-an alang sa ekonomikanhong kalamboan sa nasud. Misaad ang duha ka senador sa dugang paningkamot aron mapanalipdan ug mapausbaw ang kaayohan sa mga kababayen-an. Tinuod nga ang kababayen-an kabahin sa tahas sa pagpalambo sa nasud. Matud pa, ang kababayen-an usa ka lawom apan wala magamit nga atabay sa talento sa atong nasud. Napamatud-an ang abilidad sa mga babaye sa panultihon nga “Ang bana mao ang ulo sa pamilya (head of the family); apan ang asawa mao man ang liog nga nagpatuyok ug nagbuot kon asa molingi ang ulo.” Muleeeng!

Pasanginlan dayon

Gipanghimakak ni Negros Oriental Representative Arnolfo Teves, Jr. nga aduna siya'y kalambigitan sa pagpusil-patay ni Gov. Roel Degamo dugang ang pag-ingon nga wala siya’y maani sa maong kamatayon. Tungod kay magkaatbang sa politika, dili kalikayan nga ilambigit ang mga Teves sa kamatayon sa gobernador. Susama kini sa estorya sa bungol nga mananagat nga sa pagpauli niya gikan sa pagpamasol, gisugat dayon sa asawa sa balita nga magminyo na ang ilang anak. Tungod kay bungol man, ug sa pagtoo nga gikasab-an siya, misumbalik pagtubag nga, “Mao jud ka, basta wala gani ko’y kuha, mangasaba dayon ka.” Fezteleern!

Daw dili molahutay

Didto sa kaulohan, nagpadayon ang ubang transport groups sa ika-duhang adlaw sa ilang gilaraw nga usa ka semana nga transport strike. Aduna na’y pipila usab ka mga driver nga mibalik na sa pagpamasada apan nakugang sila kay wala’y halos pasahero sa rota nga ilang giagian. Sa dagan sa mga panghitabo, napanglantawan nga dili molahutay ang maong strike. Mahisama kini sa swimmer nga misuway unta paglangoy gikan sa Bohol hangtud sa Cebu. Apan pag-abot niya dapit sa Olango Island, gibati na siya sa tumang kakapoy busa nakahukom na lang siya nga dili motiwas ug mobalik na lang sa Bohol. Pagkatoytoy!

Kawang ang balaod

Human sa 36 ka kamatayon ug bisan adunay higpit na nga balaod, nagpadayon gihapon ang hazing nga kabahin sa mga fraternity initiations. Napamatud-an usab nga ang pagpangita sa hustisya alang sa biktima sa hazing malisod ug dugay. Tataw nga dili lang balaod ang mahinungdanon kon dili ang pagpatuman niini. Bisan kon unsa ka higpit ang balaod ug kadako sa silot alang sa malapason, kon dili kini mapatuman, mahimong kawang ang tanan. Mao kana’y giingon sa pagya nga “May’pag maglana og potot.” Madahaan!