Perteng lipaya

Naglutaw pa gihapon sa kalipay si Bianca Gonzales sa pagkapili niya isip bag-ong co-host sa The Voice Kids Philippines nga magsugod na sa Sabado, 7pm. Matud ni Bianca: "Still honestly incredibly surreal. Honored, happy, grateful, nervous, excited, halo halo naaa! Isang linggo na lang, #TheVoiceKidsPH na!!!  Sharing more soon. Si Robi Domingo iyang co-host. Season 4 na kini. Si Luis Manzano ang host sa Season 3.

Pilde si Nora

Nalupig ang rating sa paglugwa ni Superstar Nora Aunor sa Fast Talk With Boy Abunda niadtong Lunes, sa episode sa maong talk show niadtong Biyernes diin si Sanya Lopez ang guest. Naka 6.2% ang episode ni Sanya sama sa rating sab sa kang Carla Abellana. Ang kang Nora, 6%.

Shine, tua nas Switzerland

Nilupad na si Sunshine Cruz paingon sa Switzerland niadtong Martes sa gabii. Kini alang sa taping sa Unbreak My Heart--ang collab project sa ABS-CBN ug GMA7 nga isalida sa streaming app Viu. “Sobrang grateful ako and thankful sa GMA, ABS-CBN, Viu, and Dreamscape na ako napili nila to play the role, very excited. Always grateful ako sa pagtitiwala sa akin." Suma ni Shine, gitun-an na niya ang iyang mga linya kay nasayud siya nga pinaspasay gyud sila didto. Sila si Jodi Sta. Maria ug Richard Yap, kauban sila si Gabbi Garcia ug Joshua Garcia ang mga bida niini.

Tungod sa "tiny man"?

Medyo napikal si Albie Casino sa nagbinastos niya nga foreigner sa IG. Una niini, morag gisakyan lang ni Albie ang maong foreigner nga nanghambog nga daghan na kaayo siya og nasuroy nga mga nasud, ug kay dili man ka afford si Albie, igo na lang mag-imagine ang aktor sa mga hulagway sa foreigner. Apan ang medyo nakapungot kang Albie mao ang pagtawag niini kaniya og "tiny man". "I wanna eat you for breakfast tiny man." Maoy kompleto nga giingon sa foreigner. Tubag ni Albie: You wanna eat me that bad man? Chill Broooo.

Bati'g mga nawong!

Wala sab palabya ni Aura Briguela ang mga nibiaybiay sa iyang hulagway nga nag-two piece. Labihan ang bashing nga nadawat ni Aura diin below the belt na ang uban niini. Apan wala nagpapiri si Aura pinaagi sa pag-ingon nga naglibog siya nganong ang mga bati'g nawong mao pa hinuoy kusog mangaway og bayot. Kasagaran sa mga nibash ni Aura mga lalaki.

Good luck, Ashley!

Nilupad na kagahapon paingon sa Egypt ang pambato sa Pilipinas alang sa Miss Eco International nga si Ashley Subijano Montenegro.

Naghinamhinam na ang beauty queen nga mahimamat ang ubang mga kandidata ug mapasigarbo ang Pilipinas didto.  Labaw sa tanan, panganti niya ang back-to-back win alang sa Pilipinas sanglit ang kasamtangang rayna niini mao man si Kathleen Paton nga pambato sa nasud sa nilabay nga tuig.

Kun modaog si Ashley, siya na ang ikatulong Pinay nga Miss Eco International. Ang labing una mao si Cynthia Tomalla niadtong 2018. 

* * *

Basta mo-propose...

Andam na nga magminyo si Rabiya Mateo kun ugaling hagdon siya sa iyang uyab nga si Jeric Gonzales.

Kini maoy iyang gibutyag ngadto sa Fast Talk with Boy Abunda sa GMA7 niadtong Martes. Suma niya, napalitan na niya og balay ang iyang inahan, aduna na sab siyay tinigom.

 "Siguro hindi agad-agad, pero siguro in two years, kasi gusto ko rin maging nanay na. I can see myself." Nagkanayon si kanhi Miss Universe Philippines.

Gibutyag sab niya sa interview nga ni-propose sab ang iyang longtime boyfriend nga si Neil Salvacion kaniadtong 23 years old pa lamang siya.Niya pa, nibalibad siya kay maoy pagdaug niya sa MUP niadtong tungora ug daghan pa siyag buot makab-ot alang sa iyang kaugalingon ug pamilya.