CEBU, Philippines — Napuno sa kasadya ang kadalanan sa Sta. Fe, Bantayan Island adlaw niadtong Lunes sa hapon gumikan sa gipahigayon nga street dancing nga gisalmotan sa 10 ka mga barangay sa maong lungsod, isip tipik sa Sinulog 2023, pahinungod sa Balaang Bata atol sa kapistahan niini niadtong adlawa.
Bisan tuod kun naglagiting ang kainit, apan ang mga bata nga naglangkob sa nagkadaiyang contingents wala mopakita’g kaluya, hinuon, todo ikid gyud sila nga puno sa pahiyom ilabi na sa atubangan sa mga hurado nga ilang naagian diha sa kadalanan.
Larawan sa panaghiusa ug pagmaya ang maong adlaw, diin ang mga opisyal sa lungsod pinanguluhan sa ilang mayor nga si Hon. Ithamar Espinosa, ang mikuyog sab gyud sa street dancing. Ug mismo si Espinosa, nisayaw-sayaw sab gyud hinungdan nga nalingaw sab ang mga nanan-aw. Niuban sab ang nagkadaiyang grupo sa mga mag-uuma ug mangingisda, ingon man mga fraternities.
Nilanat og mga duha ka oras ang street dancing.
Pagkagabii, gipahigayon ang ritual showdown diin mas nagpahugyaway pa ang 10 ka contingents sa ilang nagkadaiyang mga konsepto nga nagpakita sa kabalaan ug ka milagroso ni Sr. Sto. Nino.
Human sa kapin duha ka mga oras, tulo lamang sa 10 ka contingents ang gipili sa mga hurado isip mananaog. Ug nigawas nga labing madaogon niadtong adlawa ang contingent gikan sa Barangay Pooc sanglit giharos nila ang tanan pasidungog sa maong festival.
Linibo nga premyo ang nadawat sa mga mananaog ilabi na sa ritual showdown category. Dungan niini, si Konsehal James Philip “Jaypee” Lao, kinsa chairman sa Committee on Tourism and Development sa konseho sa maong lungsod, mapasalamaton ngadto sa tanan nga nakatampo sa kalampusan sa maong kalihukan.
“Karong fiesta celebration namo makaingun ko nga doble gyud ang pagpandam sa LGU Santa Fe headed by the Mayor, Ithamar Espinosa. Kay gawas sa among ka pistahan, a day after, Suroy Suroy sa Sugbo Northern Escapade dayon sa among lungsod. Mapasalamatun kami nga nagmalampuson ang among kalihukan sa pista.
Tungod kana sa pangaliya ni Senor Santo Nino. Pagkahuman sa pista, lahus preparation na pod sa Suroy Suroy. Exciting nga kulbahinam gyud ni nga mga panahon,” ni Lao pa.