Sinulog Idol grand finals

Ang garbo sa Dakbayan sa Talisay nga si Johnel “Nel’ Bucog mao ang midaog isip Sinulog Idol Season 14 Champion.

Ang 20 anyos kinasingkasing nga miawit sa iyang inspirational ug final piece nga “Taller, Better, Stronger” ni Guy Sebastian nga maoy nakapadaog niya sa kinabag-an ug sa mga hurado.

Matud pa ni Johnel nga haum ang maong kanta sa iyang mga kaagi sa Sinulog Idol gumikan kay ikaduhang higayon na siya nga nipaubos og audition sa maong kompetisyon apan sa ikaduhang higayon lang siya nga nakapasar ug nahimong kabahin isip finalist.

Dugang pa ni Johnel nga bisan og wala siya nadala sa unang higayon sa iyang pagpaubos og audition apan wala siya nawad-an og paglaum nga mosulay pagbalik.

Giangkon niya nga sa pagsulay niya pagbalik og apil, nahadlok siya gumikan kay sa panahon sa audition, pagaw gyud siya ug dili niya makalimtan ang mga komento sa mga hurado atol sa audition sama sa wala na-feel ni Coach Ryan Mark ang iyang pagkanta ug matud pa sab ni Coach Apple Abarquez nga mura sab og wala sa audition ang iyang hunahuna kun diin sa laktod nga pagkastorya, galutaw ang iyang hunahuna samtang nipailawom sa audition.

Apan mapasalamaton siya sa kahigayunan nga gihatag sa mga hurado kaniya ug gipapasar siya.

Mao nga naningkamot gyud siya nga dili mapakyas ang mga hurado sa gihimong hukom niini nga mahimo siya nga kabahin sa Top 12 ug gani, gituhop niya ang mga pagtulun-an nga gipangtudlo kanila sa mga workshop nga gidalit sa kompetisyon.

Gani, gipamatud-an sab ni Johnel nga dako gyud og kausaban sa iyang kinabuhi ug sa iyang pamaagi sa pagpasundayag human siya nga nahimong kabahin sa maong kompetisyon gumikan kay gihulma gyud siya niini aron nga mapakita gyud ang iyang tinuod nga katakus kun diin dili lang kutob lang sa pagkanta ang iyang gibuhat apan mas kamao na siya nga modala sa iyang kaugalingon, sa iyang kanta ug sa kun unsaon niya paghatod sa mensahe sa matag kanta nga iyang awiton ngadto sa mga tawo nga iyang ikatubang sa matag higayon nga mopasundayag siya.

Giangkon ni Johnel nga dili lalim ang iyang mga kaagi sa kinabuhi ug sa iyang kaagi paingon sa gikahinamang titulo. Matud pa niya nga hapit na siya kapuyon tungod sa sagunson nga pagpasundayag matag gabii apan gipaningkamutan niya nga ibalewala ang iyang gibati nga kakapoy tungod kay aduna siyay pangandoy ug tungod kay ang iyang pagsalmot, gipahinungod kini niya sa iyang anhing igsuon nga si Shiela Bucog kinsa nahimong kabahin sab sa Sinulog Idol Season 5 ug nahimo kini nga first runner-up.

“I know gi-ubanan ko niya gabie during my battle kay sa tinuod gyud, pagsud nako sa Fuente naglain na gyud ako pamati. Lahi ra pag Day 1 ang kakulba nga di gyud nako ma-explain”, padayag pa ni Johnel.

Ang inahan ni Johnel nga si Rosenda Bucog miingon nga nabatyagan gyud nila ang presensya ni Shiela sukad pa nagsugod si Johnel sa kompetisyon ug gigiyahan gyud si Johnel aron nga makalahutay kini paingon sa grand finals.

Sa laing bahin, Sila si Jovie “Jov” Loon ug Doreen “Dee” Geralla kinsa puro garbo sa Pinamungajan, Cebu ang nagmalampuson sa kompetisyon human nga nitapos sila isip first runner-up ug second runner-up.

Sa katapusag hugna sa kompetisyon, gipabilib ni Jovie ang mga tawo sa iyang awit nga “Believe” nga gipasikat ni Adam Lambert kun diin bisan ang mga wala nakaila kaniya sa Fuente Osmeña, miabiba kaniya. Sama sab kini kang Dee atol sa iyang pag-awit og  “Follow your Dreams” ni Sheryn Regis, kasagaran sa mga tawo miabiba sab kaniya kun diin mura og nagdala ang duha og mga tawo gikan sa Pinamungajan aron nga moabiba kanilang duha.

Ang tulo tumang pasalamat sa kahigayunan nga malakip sa kompetisyon kun diin matud pa nila nga dili gyud nila hikalimtan ang mga kasinatian nga naangkon.

Sa bahin ni Jovie, ang iyang byahe paingon sa grand finals dili sab ingon nga sayon apan dako ang iyang pasalamat sa mga tawo nga nagpaluyo kaniya tungod sa kanunay nga pagdasig kaniya nga kanunay nga mopadayon magkinaunsa man.

Sa kaagi ni Dee, siya ang labing una nga finalist nga naggikan sa wildcard round. Sa unang Top 12, wala nahimong kabahin si Dee apan tungod sa gamay nga kakulian, wala magdahum si Dee nga makadawat og tawag nga lakip siya sa makigtigi sa wildcard.

Tumang kalipay ang nabati ni Dee sa dihang siya ang napilian nga mahimong kabahin sa Top 12.

“Wala gyud ko mag-expect aning tanan, abi nako sa next season nako moapil pero grabe ang paagi sa Ginoo ug bisan wildcard contender ko, gipaningkamutan nako nga naa gyud koy lugar diri sa Sinulog Idol”.

Sa laing bahin, nahimong 3rd Runner-up si Raffy Buenconsejo, 4th Runner-up si Mary Therese Jade “Tere” Damos, ug 5th Runner-up sab si Maxell “Max” Muldez.

Dagkong ganti ang mga nauli sa mananaug ug gani, karong tuiga, daghang mga sponsors ang miambit sa kompetisyon kun diin bulahan ang mga mananaog karon gumikan kay dugang mga papremyo ang ilang nadawat gikan sa pagsalmot sa kompetisyon.

Katorse ka tuig na nga nagdagan ang Sinulog Idol ug gihimo kini sa Soundtraxx Production Studio kauban ang Cebu City Government ug ang Sinulog Foundation Inc.

Ang Sinulog Idol Season 14 mao ang labing makasaysayanon nga tuig gumikan kay daghang mga rebelasyon ug paukyab ang nahitabo, ug bisan pa man og uwan-uwan, daghang kakulian nga nasinati, padayon gihapon ang pagpahigayon sa maong kalihukan aron nga makahatod og kalingawan sa Fuente Osmeña Circle.