CEBU, Philippines — Giangkon ni Thea Tolentino nga duna siya'y uyab nga piloto nga ginganlan og Martin San Miguel. Usa ka tuig na ang ilang relasyon ug ang aktor nga si Juancho Trivino maoy tulay nga nagkaila sila niini .
Giingong nakahatag og positibong resulta ang pagpakahilom ni Thea sa iyang lovelife gumikan kay nalayo gyud sila sa mga intriga.
BPCI wala mo-renewsa Ms. Grand International
Hingpit na nga gitapos sa Binibining Pilipinas Charities, Inc. (BPCI) ang relasyon nila sa Miss Grand International ug dili na sila mo-renew sa ilang prangkisa niini
"We thank the organizers of Miss Grand International and wish them the best in their future endeavours," tipik sa statement sa BPCI.
Gitataw sa BPCI nga dul-an na sa 60 ka tuig ang pagdalit nila og mga kandidata nga nagmadaogon sa nagkadaiyang international pageants ug mapasalamaton sila sa suporta sa ilang fans.
"We will be forever grateful for their dedication, passion, and love for Bb. Pilipinas and our Queens," suma pa niini .
Dunay nitumaw nga intriga nga posibleng usa sa nakaaghat sa maong desisyon mao ang wala pagkasulod ni Miss Grand Philippines Roberta Tamondong sa Top 10 sa finale sa Miss Grand International 2022 niadtong Oktubre 25, 2022. Nasayran nga ubay-ubay ka fans niini ang wala mahimout sa maong resulta.
Choi Hyun-wook misuroy sa Pilipinas
Nasigpatan ang sikat nga Korean star nga si Choi Hyun-wook nga nibakasyon dinhi sa Pilipinas partikular na sa Antique ug Boracay Island. Pipila sa iyang Pinoy fans kay abtik nga nagpahulagway kaniya.
Nitikang usab ang aktor sa Malumpati Health Spring And Tourist Resort. Usa sa mga sikat nga K-Drama ni Hyun-wook mao ang Twenty-Five Twenty-One nga naglawig niadtong Pebrero hangtod sa Abril 2022.
Selebrasyon sa 40th showbiz anniversary ni Martin
Gibutyag sa Concert King nga si Martin Nievera nga ang pag-renew sa iyang kontrata sa ABS-CBN maoy usa sa highlights sa iyang 40th showbiz anniversary.
Kahinumdoman nga ni-renew ang singer sa iyang kontrata sa maong network sa wala pa sugdi ang "ASAP Natin 'To" sa Las Vegas niadtong weekend.
"To be asked to stay Kapamilya forever, I'm very touched. The word Kapamilya may sound like a title, but for me it's a true honor. It's a great badge we wear because some of the greatest artists have walked our hallways and studios," nagkanayon si Martin.
Usa si Martin sa mga unang artista sa ABS-CBN sa dihang subli kini nga gibuksan niadtong 1986 ug usa siya sa mga karaan nga performer sa longest-running musical variety show sa nasud nga "ASAP Natin 'To."
Nitambong sa contract signing event mao sila si ABS-CBN president ug CEO Carlo Katigbak ug "COO for broadcast" nga si Cory Vidanes .
Trailer sa "The Iron Heart" gihangop
Sulod lang sa usa ka adlaw, nakabaton dayon og 2.6 million views ang official trailer sa upcoming Kapamilya series nga The Iron Heart.
Gidayeg og maayo ang pipila ka bahin sa action scenes sa maong teleserye. Nasayran nga dunay mga eksena niini nga gigama mismo dinhi sa Sugbo. Sila si Richard Gutierrez ug Maja Salvador ang mga bida sa maong proyekto.
Paolo gireklamo sa SAF
Nakadawat diay og reklamo sa Special Action Force (SAF) ang aktor nga si Paolo Gumabao ug pipila ka mga kaubanan niini sa pelikulang Mamasapano: Now It Can Be Told gumikan sa pagsul-ob og SAF uniform samtang nag-TikTok.
Niangkon si Paolo sa iyang kasaypanan ug nisaad nga dili na kini mausab.
"Nag-start yun sa isang TikTok video ko na suot ko yung uniform ng SAF and I was dancing. Ginaya ko yung TikTok ni Joshua (Garcia). So, na-offend sila dun and I understand naman siyempre. So at least ako, lesson learned, hindi na po mauulit," matud pa niya.
Kasal, annulled ug dunay anak dawaton sa Miss Universe Philippines
Magsugod na og panawat og mga aplikante ang mga tagdumala sa Miss Universe Philippines 2023.
Kinahanglan lang gyud nga usa kini ka Filipino citizen, walay height requirement, ug nagpangedaron og 18 hangtod sa 27 anyos.
Sa taho sa PEP, giklaro ni Miss Universe Philippines Creative Director Jonas Gaffud nga modawat sila og aplikante nga kasal, annulled, ug dunay anak.
Pinasubay kini sa internal memorandum ug lagda nga gipadala niadtong August 2022 sa Miss Universe Organization .
"We all believe that women should have agency over their lives and that a human's personal decisions should not be a barrier to their success,” tipik sa unod sa memorandum sa Miss Universe Organization. Ang 71st Miss Universe kay pagahimoon sa New Orleans, Louisiana karong Enero 14, 2023. Ang Filipino-Italian nga si Celesti Cortesi maoy pambato sa Pilipinas sa maong prestihiyosong indigay.