Sunshine Cruz imbyerna sa 'fake news' na nabuntis siya ng ex na si Cesar Montano
MANILA, Philippines — Pinabulaanan ng aktres na si Sunshine Cruz ang mga kumakalat na maling impormasyon na buntis daw siya sa ex-husband na si Cesar Montano — ito habang humihiling ng respeto para sa mga bago nilang karelasyon ngayon.
Ito ang pahayag ni Sunshine, Lunes, sa Facebook patungkol sa sari-saring Youtube videos na nagsasabing nagkabalikan daw sila ni Cesar at nabuntis s'ya nito, maliban pa sa tsismis na magpapakasal silang muli.
"FAKE NEWS! I’ve been sent a few videos about this fake news spreading and nagtataka nga ako na may mga bumabati at congratulate sakin," sabi niya sa isang paskil kanina.
"Since meron pa ring napapaniwala and as respect sa partner at bagong pamilya ni Cesar, gusto ko sabihin na wala pong katotohanang buntis ako at magpapakasal sa aking ex-husband."
Ilan sa mga naglipanang Youtube videos ang mga sumusunod:
- JUST IN! Sunshine Cruz UMAMING Buntis sa ikaapat na Pagkakataon! Cesar Montano Proud Daddy!
- OMG! CESAR Montano ISINAPUBLIKO na ang PAGBUBUNTIS ni SUNSHINE Cruz!
- JUST IN! CESAR Montano, NAGSALITA at UMAMIN tungkol kay SUNSHINE Cruz!
- atbp.
Agosto lang nang makipagkita si Cesar sa kanyang dating misis pati na sa kasalukuyang nobyo ng huli na si Macky Mathay, bagay na nangyari sa ika-18 kaarawan ng kanilang anak na si Sam.
Napapansin ng ilan na tila tuloy-tuloy na uli ang pakikipagkaibigan ng dalawa, ito matapos ang kanilang pormal na paghihiwalay noong 2013.
Taong 2018 lang nang maibalitang naisapinal na ang annulment ng dating celebrity couple, na merong tatlong anak sa isa't isa.
Matatandaang ibinahagi noon ni Sunshine na ilang beses niyang nahuling nambababae ang kanyang dating mister. Aniya, tuluyan na nilang tinuldukan ang kanilang pagsasama nang mahuli ng kanilang mga anak na babae ang aktor sa nagawa.
Kasalukuyang karelasyon ni Cesar si Kath Angeles, na siyang nakasama na rin ni Sunshine ngayong taon. — James Relativo
- Latest
