Jeepney TV, may engrandeng pagbabalik-tanaw sa isang dekada
Inihahandog ng Jeepney TV ang kauna-unahang JTV Fan Favorites Awards sa Oktubre bilang bonggang throwback celebration ng ika-10 taon ng paghahatid ng iconic Pinoy TV sa pamamagitan ng mga programa nito.
Magbabalik-tanaw ang JTV Fan Favorite Awards: The Best of Kapamilya Entertainment sa mga tumatak na ABS-CBN shows, mula noon hanggang ngayon, na umere sa Jeepney TV sa telebisyon o di kaya naman ay napanood sa Jeepney TV Facebook page o YouTube channel.
“Gusto naming bigyang-pugay ang mga hindi maliimutang programa at karakter na talaga namang patuloy na nagmamarka sa iba’t ibang henerasyon ng mga manonood,” sabi ni Jeepney TV channel head Cindy de Leon.
Maaaring bumoto ang fans sa iba’t ibang kategorya tulad ng hindi malilimutang teleserye, iconic lines, paboritong aktor o kontrabida, at iba pa simula Hulyo 16 (Sabado) sa Join Now Microsite, Facebook, at Tiktok.
Mapapanood naman ang gawad parangal live sa Oktubre 22 (Sabado), 9 PM sa Jeepney TV YouTube channel, Facebook, at Tiktok accounts. Magkakaroon din ito ng delayed telecast sa Jeepney TV.
Isa ang Jeepney TV sa pay TV channels sa ilalim ng ABS-CBN subsidiary na Creative Programs, Inc.
Una itong napanood sa telebisyon noong Oktubre 22, 2012 at tuluyan nang naging favorite throwback channel sa bansa.
Bukod sa Kapamilya shows, Pinoy movies, Asian drama, at cartoons, napapanood din dito ang ilan sa sarili nitong produksyon tulad ng Biyaheng Retro, Showbiz Pa More!, at Kumu Star Ka.
Available ang channel sa SKY Cable ch. 9, Cignal ch. 44, GSat ch. 55, at SatLite ch. 37.
Cast ng Running Man PH, todo-bonding muna sa Korea
Nasa Korea na ang buong cast ng Running Man PH, ang biggest reality game show ng GMA-7 ngayong taon!
Naging warm at hospitable naman ang SBS Korea sa pag-welcome sa cast members na pinangungunahan nina Glaiza De Castro, Ruru Madrid, Lexi Gonzales, Kokoy De Santos, Angel Guardian, Buboy Villar, at Mikael Daez.
Habang hindi pa nagsisimula ang taping para sa programa, todo-bonding muna ang cast members.
Sa Instagram, ipinasilip ni Kokoy ang naging food trip ng grupo at pamamasyal sa Itaewon.
Samantala, todo-abang na rin ang fans kung saan sa Korea gaganapin ang challenges at sinu-sinong Korean stars ang makakasama ng cast members.
- Latest
