Ang Pagbalik Pagtulun-an ug Kamatuoran (Last of two parts)

CEBU, Philippines — Kun aduna may kaparehas ang character ni Dante Luzon sa tinuod nga kinabuhi, kini mao ang pagkahinginom niini. Sukwahi ra gyud kaayo ang pagluib sa iyang karakter sa asawa niini, itandi sa tinuod niyang kinabuhi.

Apan ang pagkahinginom niini, pupareha gyud niya, hinungdan nga niabot sa punto kaniadto nga nakaingon siya’g “alcoholic” na siya. Gibutyag ni Luzon nga nagsugod ang iyang pag-inom human sa bagyong Ruping niadtong 1990, sanglit blackout man gumikan sa kadaut nga gibilin sa maong kalamidad. Hinungdan nga maglisud siya og katulog, hinungdan nga muinom siya. Apan napaundayonan niya hinungdan nga usa ka higayon niana nakaamgo siya nga nasobrahan na ang iyang pagkahinginom sanglit pag-agi sa mamalitay og botelya, nakadala kini og hapit usa ka sako nga basiyo sa iyang mga nainom.

Taliwala sa mabugnaw nga huyohoy sa lab-as nga hangin sa Soul Sierra sa Barangay Babag 1, diin didto gipahigayon ang presscon niining maong telemovie niadtong Domingo, wala sab gitago ni Luzon nga kaniadtong nag-alagad pa siya sa CCTN isip broadcaster,(human sa hataas nga katuigan sa ABS-CBN), gidungog siya nga saputon o init og dugo ngadto sa iyang mga ka trabaho. Resulta niya pa kadto sa iyang pag-inom.

 “Usahay when I’m tipsy or intoxicated, mogawas man gud na. I still have temper but now I mellow down,” sinsero niyang pamahayag.

Hinungdan nga bisan og daghan na siya og roles kaniadto nga salbahis nga amahan ug bana, mas ganahan siya karon sa iyang karakter sa Ang Pagbalik gumikan kay naghinulsul man kini sa iyang mga kasaypanan nga mao say nahitabo sa tinuod niyang kinabuhi.

Samtang ang abogado nga si Win Prada, kinsa aduna nay kasinatian sa pag-arte sa entablado, niangkon nga nakulbaan siya niining unang higayon nga niarte siya sa camera. Apan naka relate siya sa iyang karakter nga usa ka buotan nga bana.

“The thought of acting scared me. But I had a lot of mora bitaw’g pundo nga emotion ana nga sige I can share this, because anyway I’ve grown up to be a responsible person.  I saw my father, he was submissive. So it was relatable. Ang ako na lang was how to get the message across. Yes, witness ka ana--nakita na nimo sa palibot-- but kun ikaw na ana, how do you do that?” padayag ni Prada.

Take One

Bug-at ang opening scene sa Ang Pagbalik. Kini mao ang kumprontasyon sa mga karakter nila ni Luzon ug Diez, human nasakpan sa asawa nga adunay iring-iring ang iyang bana. Nisampot kini sa paglabay ni Luzon sa cellphone nga nibanda sa bungbong, hinungdan nga nabuak. Matud ni Luzon, kinahanglan nga take one ra gyud ang maong eksena kay kundili, wala na silay laing cellphone nga ilabay ug buk-on.

Take one sab ang pagsagpa ni Joan Flores kang Lorenz Evangelio, anak sa banggiitang director kaniadto nga si Al Evangelio. Si Lorenz, nidala sa papel nga manghud ni Luzon ug nikomprontasi sa kabit nga si Flores. Kusog ug gitinuod gyud pagsagpa ni Flores si Lorenz, hinungdan nga nabungog gyud ang nauwahi. Gani, nisampot pa sa pagpa check-up niya sa doctor human sa ilang shooting.

Sa presscon, subling nangayo og pasaylo si Flores ngadto kang Lorenz gumikan sa nahitabo. Apan nakasabot ra si Lorenz niini sanglit theater actor man siya. Nasayud siya nga aduna gyuy mga higayon nga madala og maayo sa emosyon ang artista. Si Flores sab, dili na bag-o sa natad sa pag-arte sanglit apil siya kaniadto sa mga teleserye sa ABS-CBN. Apan unang higayon kini nga kontrabida siya ug nakasagpa pa gyud./Ryan Mark

* * *

Ang Ang Pagbalik,isalida na ugma pinaagi sa Help TV FB page niining musunod nga schedule:  June 20, 6 pm; June 21, 4 pm; June 22, 8 pm.