Wall, Nance Jr. lagmit dili katiwas og duwa sa nahabiling season

CEBU, Philippines — Lagmit dili makatiwas og duwa sa nahabiling nga season sila si John Wall sa Houston Rockets ug Larry Nance Jr. sa Cleveland Cavaliers gumikan sa ilang tagsa-tagsa ka injury.

Ang guwardiya sa Rockets nga si Wall delikadong mapalta sa nahabilin nga season tungod sa strained right hamstring. Naangkon niya ang injury niadtong Sabado sa ilang duwa batok sa Los Angeles Clippers. Gipaubos siya sa MRI niadtong Lunes ug nasuta nga adunay injury.

Ang injury nakadugang sa kalbaryo sa Rockets, kinsa adunay 15-46 win-loss record ug nahimong labing bati nga team sa NBA sukad gibuhian ang superstar nga si James Harden. Ang Rockets aduna na la'y nahabiling 11 ka mga duwa.

Si nakaangkon og nagkalin-laing nga injuries karong nga season ug wala makapakita'g aksiyon sud sa 21 ka mga duwa sa iyang pagbalik human napalta sa tanang mga duwa sa miaging season tungod sa Achilles tendon surgery.

Sa iyang bahin, si Nance Jr. nabuak ang iyang tuong kumagko atol sa ilang kapildihan ngadto sa Washington Wizards niadtong Lunes ug  kuyaw sab nga dili makatiwas sa nahabiling mga duwa karon nga season. 

Ang nabuak nga kumagko maoy labing bag-o nga medical setback ni Nance Jr., kinsa napalta og pito ka mga duwa.

Ang 28-year-old nga si Nance Jr.  nag-average og  9.3 points ug 6.7 rebounds sa 35 ka mga duwa.