Gerald: It’s a yes

CEBU, Philippines — Hingpit na nga giangkon ni Gerald Anderson nga aduna silay relasyon ni Julia Barretto u gang aktres maoy tinubdan sa iyang tumang kalipay karong mga panahona.

Ang kumpirmasyon ni Gerald giluwatan niya niadtong Biyernes, duha ka adlaw sa dili pa ang iyang birthday karong adlawa, March 7. Kini pinaagi sa interview ni King of Talk Boy Abunda nga gipakita sa Youtube channel sa host.

Ang dagan sa interview mao kini:

Boy: “You are happy.”

Gerald: “Yes, Tito, I am.”

Boy: “Are you happy because of Julia?”

 Gerald: “Very happy."

Gibalik ni Boy ang pangutana kun gumikan ba gyud ni Julia ang kalipay ni Gerald.

Gerald: “Very happy, Tito Boy. It’s a yes.”

Kahinumduman nga taod-taod na ang pagduda nga aduna nay relasyon ang duruha. Pangutana pa kun kanus-a nagsugod ang maong relasyon nga bag-ohay lang hingpit na nga giangkon ni Gerald.

Ayaw mo’g nilabad gyud!

May tambag alang sa mga young stars ang banggiitang kontrabida sa mga salida kaniadto nga si Princess Punzalan kabahin sa tinarong nga trabaho ug pamatasan kun anaa na sa set. Kini dihang na-interview siya ni Paolo Contis sa GMA7 online show nga Just In bag-ohay lamang.

Gipamunto ni Princess nga lahi na ang mga batan-ong artista karon itandi nila kaniadto. Suma pa niya nga ang taping para sa usa ka episode kaniadto, usa ra gyud ka adlaw busa pinaspasay gyud. Hinungdan nga kinahanglan nga inig abot nimo sa set ready na gyud ka, wala nakay pangutana aron dili mausik ang oras.

Apan karon, lahi na niya pa ang young stars kay daghan na kaayo’g mga inarte. Busa tambag niya: Pag nasa set, wag nang magtelepono, wag nang mag-text.

“Pag nagri-reading na, wag nang gumamit ng telepono, ‘no?!

“Nasa trabaho ka para magtrabaho. Hindi para maki-chika at mag-social media, my gosh!”

Kun pailison na gani, kinahanglan mag-ilis na diretso, dili na magdaghan og arte arte ug langay-langay. Si Princess atua na magbase sa California, diin minyo na siya sa iyang American partner ug may anak na sila. Registered nurse siya didto ug professional actor sab. Kun makabakasyon siya sa Pilipinas, mudawat lang gihapon siya og acting projects.

Verified FB account, gihimakak ni Lloydie!

Walay facebook account si John Lloyd Cruz. Kini maoy giklaro sa iyang kampo niadtong Biyernes, diin nagpatabang pa ang actor kang Maja Salvador aron ipakatap sa publiko nga wala siyay facebook o bisan unsa nga social media account.

Giluwatan sa actor ang maong katin-awan human nabaniog ang matud pa paghatag niya og tambag ngadto kang Joshua Garcia nga gi-pick-up sa nagkadaiyang media outfits ug entertainment sites niadtong February 25.

Gani, aduna na kini 5.4K shares, buot pasabot daghan na ang nakabasa sab sa maong post nga nagkanayon, "One day everything will fall into place just the way it should be. So until then, don’t focus too much on the confusion. Just focus on improvement and betterment. Create a great life for yourself Joshua Garcia."

May kalakip na nga black and white photo nila ni Joshua ug Loydie nga nag-agbayay.

Apan matud ni Lloydie, dili iyaha ang maong verified FB account ug wala siya makauyon nga gipalutaw nga siya maoy tinubdan sa maong post.

"AKO PO AY WALANG KAHIT ANONG SOCIAL MEDIA ACCOUNT. WALA PO AKONG FACEBOOK, INSTAGRAM, TWITTER, MySpace, Friendster or Tumbler etc." Pagtin-aw sa actor pinaagi sa iyang official statement.

Wala sab siya’y Lyka account busa panawagan niya, magmatngon sa paghatag og gems.

"HUWAG PO KAYONG MAGPALINLANG. HUWAG PO KAYONG MAGPALOKO. Marami na hong peke sa mundo. Huwag na po nating dagdagan."

Samtang ang verified FB page nga gihimakak ni Lloydie nga gipanag-iya niya adunay 1.5million followers.  Suma pa, kun ang usa ka account verified, nagpasabot kini nga niagi og makuti nga security protocols ug nakumpirma nga lehitimo kini nga account.

Kapamilya Primetime shows sa TV5

Kumpirmado nga isalida sa TV5 sugod ugma sa gabii ang upat ka shows nga nalakip sa primetime block sa ABS-CBN nga mao ang FPJ's Ang Probinsyano; Ang Sa Iyo Ay Akin; Walang Hanggang Paalam, ug Pinoy Big Brother: Connect. Padayon ra gihapon nga makita ang maong mga shows sa A2Z, Kapamilya Online Live sa Facebook ug Youtube; ug Kapamilya Channel sa cable.

Deadma ang Kitkat

Deadma matud pa ang kampo ni Kitkat sa pakig-areglo sa kampo ni Janno Gibbs sa ilang panag-away nga maoy hinungdan nga managsama sila nga gipaundang lang una isip co-hosts sa Net25 noontime show Happy Time. Usa lang ang kondisyon sa estasyon nila: mag-uli sila sa maayong kabubut-on.  Andam matud pa si Janno nga magpinasayloay ug kalimtan ang nahitabo apan wala pay reaksyon si Kitkat niini.

“Charaught!”

Nikomento gyud si Solenn Heussaff sa sweet photos nila ni Derek Ramsay ug Ellen Adarna sa Instagram niadtong nilabay nga adlaw. Komento ni Solenn sa naggakos nga manag-uyab: Cute naman." Gitubag kini ni Ellen og, "@solenn charaught! hahaha." Baniog sa publiko nga si Derek ang first boyfriend ni Solenn niadtong wala pa siya nag-artista. Nagbulag sila sanglit long distance relationship ang ilang set up niadtong higayona, apan pabilin ang maayo nilang panaghigalaay hangtud karon ug nagkatrabaho pa gani sila sa duha ka mga pelikula. Samtang niadtong 2014, gibutyag ni Solenn nga workout buddy niya si Ellen ug nga ganahan siya niini sanglit prangka ug walay paki sa komento sa mga tawo.