Fans, may sey sa mga bida ng Pa-Mine Pare!

Nasa kamay ng fans kung sinong Star Hunt at Star Magic actors ang bibida sa pinakabagong PILIkula mula sa ABS-CBN sa Kumu, YouTube at KTX.PH, ang BL show na Pa-Mine Pare!

Hanggang Pebrero 21, maaaring bumoto ang fans sa Kumu at KTX.PH kung sino kina Gian Wang, Eian Rances, Shoichi Oka, Tan Roncal, at Ali Abinal ang magdadala ng kilig.

Matutunghayan sa Pa-Mine Pare! ang kwento ng dalawang binata, sina Anton at Davie, na matagal nang matalik na magkaibigan at business partners. Pero dahil sa isang halik, magbabago ang kanilang paningin sa isa’t isa at mas makikilala nila ang kanilang mga sarili.

Sa mga hindi pa sigurado kung sino ang kanilang iboboto, maaari naman panoorin ang live streams ng apat na binata sa Kumu.

Malakas sa digital platform ang BL series kaya naman parami nang parami ang napapanood na ganito ang tema.