Kuya Kim, Dyan at Korina, digital na rin ang mga programa

Tuloy ang current affairs program ng ABS-CBN na Matanglawin, Sports U, at Rated K para handugan ang mga manononood na nasa gitna pa rin ng pandemya sa pamamagitan ng mga eksklusibong palabas sa pamamagitan ng Facebook.

Hatid ng premyadong educational program host na si Kim Atienza sa Facebook page ng Matanglawin (@MatanglawinTV) ang masasa­yang videos araw-araw na kapupulutan ng aral ng kabataan ngayong quarantine. Kabilang dito ang Matanglawin Extra na may dalang mga nakamamanghang balita tungkol sa siyensya, at ang Facebook Live ni Kuya Kim tuwing Huwebes, kung saan sumusubok ang Kapamilya stars tulad nina Seth Fedelin o ang LouDre loveteam ng mga experiment o challenge.

Magkakaroon din sila ng Matanglawin Classroom ngayong buwan para patuloy na matuto ang kabataan kahit nasa loob lamang ng bahay dahil sa krisis sa COVID-19. Sa ngayon, pwede muna nilang balikan ang mga adventures ni Kuya Kim sa Matanglawin Rewind kada linggo.

Samantala, handog naman ng Sports U Ikaw Ang Panalo ang mga kwentong magbibigay inspirasyon sa manonood para ma­panatili ang kanilang malusog na pangangatawan at positibong pananaw sa buhay. Nariyan ang live interviews sa mga iniidolong atleta tulad nina June Mar Fajardo, Alyssa Valdez, at ang Ravena family tuwing Huwebes ng 5 p.m. Libo-libong views ang nakukuha ng mga panayam sa Facebook, sa pangunguna ng interbyu ng anchor na si Dyan Castillejo kay Alyssa.

Nagbabahagi rin ang sports news icon ng iba’t ibang ehersisyo na kayang gawin sa bahay sa Dyanfit, at hindi rin nagpapahuli ang ilang celebrity sa kanyang hamon na workout sa Sports U Panalo Challenge.

Pumunta lang sa @SportsUtv sa Facebook para sa workout challenge na ginawa ng beauty queens na sina Pia Wurtzbach, Gazini Ganados, Rachel Peters, at Maxine Medina na sa kasalukuyan ay kasama ‘yun sa kanilang pinagkakaabalahan.

Handog naman ni Korina Sanchez-Roxas ang mga kwento ng pag-asa, pananampalataya, at katatagan na tagos sa puso sa Rated K.

Tuwing 6:45 pm ng Linggo, ipapalabas ang chikahan ng multi-awarded journalist kasama ang mga pinag-uusapan na personalidad tulad nina Kim Chiu at Pinky Amador sa Rated K Exclusive kung saan nakakuha na ng higit sa tatlong milyong views ang video ng one-on-one interview ni Korina kay Pinky, na paksa ng isang viral video kamakailan lang.

RATEDKlasiks naman tuwing Martes para sa mga istoryang natampok na sa programa na tiyak na magbibigay ng inspirasyon sa ating lahat. Bida naman ang trending topics at mga nagbabagang isyu tuwing Huwebes sa RatedK Now.

In all fairness sa ABS-CBN, hindi man sila napapanood ngayon sa free TV dahil sa problema sa franchise, active naman sa social media ang mga programa nila.