Hello, maayong adlaw! Naghisgot naman ko about aning Decluterring Cebu FB group page last Sunday, apan ako lang lugwayan kay daghang mga mabulukong nahitabo sa nilabayng usa ka semana. Yes, people were so generous. In fact, nakahatag mi'g close to 20K donations. Daghan sab gyud kaayong nangayo og tabang ug tabangonon. Hayyy!
Yes, Sabado sa gabii nagsugod og abot ang donations and pledges. Naluoy sila sa mga panawagan sa mga inahan nga nangayo og gatas ug bugas para sa ilang mga anak. Nagkadaiyang istorya sa panginahanglan nga gitubag usab og mga maanindot nga istorya sa pagtabang. Ug tanang donors nagdumili gyud nga magpaila. Nay uban nga niingon, dili sila kinahanglan magpaila kay dili man sila kandidato. Aduna say niingon nga dili sila magpaila kay dili pasikat ang ilang tuyo, ug nga dili makauyon ang Ginoo kun ilang ibandilyo ang ilang pagtabang. Pakpak!
And I love all donors for making it a point to really remain anonymous. Kay ang ako gyung baruganan mahitungod anang pagtabang kaniadto ug hangtud karon, mao nga dili gyud na kinahanglan ipasigarbo ug ipahibawo kun imoha nang personal money. Kay ang importante nakakita ang Ginoo sa imong gibuhat. After all, Bible says: When you give, do not let your left hand know what your right hand is doing.
Usa sa maanindot nga istorya sa mga natabangan mao kadtong inahan nga taga Basak San Nicholas. Gipadad-an nako siya og P1000 kay natayming nga dako ang gipada sa donor apan tulo ra sila kabuok namgayog tabang anang adlawa. Ang iyang gibuhat mao nga wala niya ihurot og palit og konsumo ang iyang nadawat, nagkuha siya og gihimo niyang capital ug naninda siya'g sud-an. Kay niya pa, aron makapalit pa sila og laing gatas nga dili na kinahanglan mangayo. Ug nauyon kaayo sa mga sakop sa Decluterring Cebu ang iyang gibuhat. Matud pa sa mga membro ang sama niya ang angayan tabangan. Pakpak!
Mao sab gyud na atong plano unta. Puhon, kun ma okay okay na ang tanan, manghinaut ta nga makatigom og igo igong hinabang aron makahatag kita og gamay puhonan like P500 or P100 aron makasugod sila og gamay negosyo, sa ingon ila kining amumahon ug patubuon aron dili na sila magsalig sa uban. But then, it will all depend on the generosity of people. Kinahanglan sab natong ipahimutang ang tanan aron dili ta mabulilyaso simbako, basin ikiha unya ta'g extortion or suyaan ta. Aguy!
Ang labing bag-ong nindot nga istorya mao ang nahitabo kagahapon. Niadtong Huwebes, dihang nanawagan og donasyon nga kuna alang sa kaluha nga 7 months pa ang pangidaron. Maglisud matud pa ang inahan pagbantay sa duruha, ug dili sila makapalit og kuna kay nawad-an og trabaho ang papa sa kaluha gumikan sa pandemya. Ug tuod man, sa susamang adlaw, may ni-donate og stroller ug biscuits alang sa kaluha. Didto kini gipaagi sa The Lugaw Project sa akong higala nga Liv Campo. Pakpak!
Unya, pagka Biyernes sa gabii, kalit nga ni chat akong amigo ug nangutana kun aduna pa bay nagkinahanglan og kuna. Niya pa, niadtong tungora ra siya nag-online, hinungdan nga mao pay pagkakita niya sa panawagan. Dihang akong gitubag nga aduna pay nangita basta i-donate lang, niingon siya nga aduna siyay ihatag ug dili niya pa barteran. Ug tuod man, gihatud gyud niya sa Marigondon ang maong kuna kagapon sa buntag. Nindot ang kuna. Ginamit na tuod apan maayo pa kaayog dagway. Hamugaway sab sanglit halapad man. Pakpak!
So there, nahugyaw ko sa kamanggihatagon sa mga tawo. Kahilakon ko maghunahuna sa kalumo sa ilang kasingkasing. Ug malipay ko mamalandong nga sa ginagmay nga pamaagi ug paningkamot, nakatabang kita og pipila. Salamat nilang tanan. Unta sa Dios sila pagabaslan og hadaghang grasya. Pero wala natay kwarta ha. Hurot na. Kun naay magpatabang, manawagan pa kita. Hahaha!
Have a blessed Sunday, dear okRYANians...