CEBU, Philippines — Gikan sa kalibutan sa pagpanibya hangtud gisudlan ang abogasiya. Mao kini ang kapalaran bag-ong na-abogado ug kanhi reporter sa TV5-Cebu nga si King Anthony Perez.
Usa siya sa nakapasar sa 2019 Bar Examinations.
“Wala gyod ko nakatuo dayon. Pagtan-aw nako sa listahan sa mga nagmalampuson sa Bar Exam, wa dayon ko nakatingog. Gipabasa pa nako ang akong miga nga si Lorie aron mutuo ko. Dayon nitawag ang akong manghod nga si Lady Isabelle aron i-congratulate ko. Sa maong higayon, nituo nako gamay. Hangtod nadawat na gyod nako nga tinuod ang maayong balita, nga usa nako ka abogado sukad atong adlawa,” saysa pa sa 27 anyos nga si King sa interview niini sa Banat News Hugyaw.
Unang nahuman niya ang kursong Mass Communication (Cum Laude) sa University of Philippines-Cebu, ug usa siya ka Juris Doctor (JD) graduate (Class Valedictorian) sa University of Cebu School of Law.
Nakaangkon usab siya kaniadto og full scholarship grant sa Foundation for Liberty and Prosperity (FLP) nga gipangulohan ni former Philippine Chief Justice Artemio Panganiban Jr.
Pasok usab ang iyang pangalan kaniadto sa GMA Media Excellence Awards niadtong April 2013.
Kahinumdoman nga nakadawat siya kaniadto og Special Citation for TV Special Event sa Cebu Archdiocesan Mass Media Awards (CAMMA) niadtong 2015. Nahimutang usab siya sa ikaduhang puwesto sa Kapisanan ng mga Brodkaster ng Pilipinas (KBP) accreditation examinations sa Cebu niadtong 2015. Usa usab ka volunteer si King sa LoveYourself, organisasyon nga nailhan sa paghatag og libreng HIV screenings ug pagtabang sa mga persons living with HIV.
Sa dihang wala pa ang resulta, gikabisihan ni King ang iyang posisyon isip Communications and Advocacy Officer sa Children’s Legal Bureau (CLB), usa sa mga inilang organisasyon sa Sugbo nga mutabang sa mga batang biktima sa pagpangabuso.
QandA
BNH: Journey nimo sa pag-take nimo og exam.
King: Dili gyod sayon ang pagpangandam sa Bar Exam. Sulod sa unom ka buwan, wala kay laing buhaton kon dili magtuon lang. Panagsa ra nako makit-an ang akong pamilya ug mga higala tungod kay naglain man ko og puyo ato aron maka-focus ko. Bati-on gyod ka og kalaay, kaguol, ug kakulba sa matag adlaw. Maihap ra ang mga adlaw nga wala ko nagtuon. Apan masaligon ka nga mupasar kon nagkugi ka sa pagtuon, mahimong inspired sa suporta sa imong pamilya, mga higala ug mga tao nga nisalig kanimo, ug pag-ampo sa Ginoo. Gasto sab kaayo ang pagpangandam kay di man gyod maayo nga nagtrabaho ka samtang nangandam sa maong exam. Mao nga wa gyod ko nilarga dayon sa Manila kay kahibalo ko nga doble ang gasto didto. Sa unang upat ka buwan, sa Cebu rako nag-review ug nag-enroll sa review center sa UC. Panagsa ra sad ko musulod sa review center ug igo lang ko mangayo og study materials kay mas komportable ko nga magtuon nga ako ra usa. Mao nga malipayon sad ko sa maayong balita nga sunod tuig, ipahigayon na ang Bar Exam diri sa Sugbo aron makatipid ug mas komportable ang mga umaabot nga manlalaban sa pagkuha sa examine
BNH: Gikan sa media world, nganong nakahuna-huna ka nga mosulod sa law school?
King: Sa dihang nigadwar ko sa akong undergraduate degree sa UP, usa sa akong mga options mao ang pagkuha og law. Apan gusto man sab nako nga i-practice ang akong kurso nga Mass Communication. Mao to nga nisulod lang usa ko sa media og dul-an tulo ka tuig. Samot nga naganahan ko nga magtungha og abogasiya human nakita nako ang mga kamatuoran sa atong katilingban pinaagi sa akong mga sinulat ug mga balita. Gikinahanglan nako nga mahimong abogado aron mas mapalapdan pa nako ang pwede nako nga mahimo sa kinabuhi, lakip na ang pagtabang sa mga tawo nga nanginahanglan og pagpanalipod.
BNH: Unsa imong kasinatian nga dili malimtan samtang nag-eskwela pa sa law school?
King: Wala’y imposible sa tawo nga makab-ot niya ang iyang mga pangandoy. Kulang ang akong tulog kanunay, labing taas nako nga tulog kay upat ka oras ra gyod na gawas kon magkasakit ko o kapoy gayod ko sa maong adlaw. Lunes hangtod Sabado man among klase matag gabii. Hago gyod kaayo. Sa Dominggo, mubasa ko daan sa mga basahonon aron dili ko mauwahi sa akong pagtuon. Sa semestral breaks ra gyod ko makabawi sa akong pamilya ug mga higala, ug mabuhat ang mga butang nga gusto nako sama sa pagsuroy-suroy ug pag-apil sa mga kalihukan kabahin sa akong mga adbokasiya. Gasto sab ang law school. Wala pa nay labot sa mga libro, pagprint sa mga kaso, ug uban pang galastuan. Mao nga nga duna’y susama nako nga mutrabaho gyod gihapon aron makasurvive sa law school.
Mapasalamaton lang ko nga sa unom ka semesters, nahimo kong scholar sa UC School of Law kay nakamaintain man ko sa akong grado.
BNH: Sa wala pa ang exam, unsa imong estilo sa pag-review?
King: Disiplina lang gyod nga mahuman ang imong mga basahunon. Maghimo og schedule sa mga buluhatonon ug maninguha nga masunod kini. Kinahanglan realistic sab ka sa mga gusto nimong basahon ug mupili og labing maayo nga mga libro ug review materials. Mupahuway lang ko’g usa ka adlaw unya mupadayon og tuon sa mga sumusunod nga adlaw. Magpractice og answer sa mga milabay nga bar exam questions aron makahibalo ka kon andam naka sa pagtake sa iksamin. Mu-attend lang ko og lectures sa review center sa mga subjects nga giangkon nako nga labing huyang ko. Mu-relax ginagmay kon gilaay na sa pagbasa. Gani nahinumdoman nako nga duna to’y usa ka semana nga wala gyod ko nagtuon kay padulong nako ma-burnout.
BNH: Lisod ba gyud ang maong kurso?
King: Lisod gyod. Di man sad ko makadeklarar nga kini ang labing lisod nga kurso tungod kay dako kaayo na nga lalisunon, apan makaingon gyod ko nga di kini sayon nga kurso. Daghan kaayong libro, balaod ug mga kaso nga basahunon ug lisod pasaron ang mga exam. Kay matod pa sa mga magtutudlo, “the preparation for the Bar starts in law school.” Mao nay hinungdan nga lisud-lisuron gyod ka sa mga magtutudlo. Mao nga gikinahanglan gyod nga imohang tumong ug tinguha ang mahimong abogado ug duna kay igong determinasyon ug kusog nga mahuman nimo ang upat ka tuig sa law school.
BNH: Unsa ang imong mga plano karon?
King: Sa tinuoray lang, wala pa ko’y konkretong plano. Ako lang sa nga gi-enjoy ang feeling nga usa nako nga hingpit nga abogado. Apan kon mahatagan nako og lisensya puhon, gusto ko nga mupadayon sa akong mga adbokasiya ug musuway og litigation o ang pagprepresentar sa mga kliyente ngadto sa korte. Gusto sab ko nga mutudlo gyod ug mupadayon sa akong pagsulat. Natanggong pa man gyod ang mga plano tungod ining Covid-19 apan makapaabot man gihapon ta sa mga oportunidad nga muabot unta.
BNH: Mensahe nimo sa mga tawong gusto mahimong abogado.
King: Ang damgo magpabilin lang nga damgo kon dili kini lihukon. Mao nga kon mu-eskwela mo og abogasiya, kinahanglan ang disiplina ug pagpaningkamot. Kon dunay mga higayon nga dili kamo magmalampuson sa inyong mga iksamin, maglig-on gihapon ug ayaw og hunong sa pagkab-ot sa imong damgo.
Kon nagduha-duha ka sa pagpadayon sa kurso, balik lang sa imong gikuptan nga damgo aron madasig kamo nga mupadayon.
FAST FACTS:
Name: King Anthony Yap Perez
Nickname: King
Nationality: Filipino
Address: Cebu City
Hobbies: Reading, Writing, Travelling, Running, Involvement with various advocacies
Motto: “With strategy, passion, grit, and perseverance, coupled with the constant drive to learn, anything is possible.”