CEBU, Philippines — Ang mga suliran mao ang magtuklod kanato aron nga makat-on kita unsaon ang pagsabay sa hangin sa duwa sa kinabuhi.
Mao kini ang istorya sa kinabuhi sa 24 anyos nga si Chris Ponce Olano kinsa miingon nga ang iyang nasinati nga suliran mao ang nakapahigmata kaniya sa kalibutan nga dili lang kalipay ang matagamtaman apan lakip na sab ang kasakit.
Gihulagway ni Chris nga nagdako siya nga maayo ang kahimtang sa iyang kabanay. Himsog ang panglawas sa iyang ginikanan ug mga igsuon, adunay maayo nga kita ang ilang koprasan ug basakan ug labaw sa tanan, namuyo nga malinawon.
Gitug-an niya nga niadtong bata pa siya wala pa gyud siya makasabot og maayo kun unsa ang termino nga “pagsuway”.
“Ordinaryo ra man gud ko sa akong pagkabata. Wala ko ka-feel nga naglisod mi kay naa mi negosyo ug maayo ra gyud ang kahimtang sa among pamilya”, suma pa niya.
Malipayon nga nagtubo si Chris ug gani, wala siya nakakita og kompetisya ngadto sa iyang mga igsuon gumikan kay patas lang ang pagtratar sa ilang ginikanan kanilang tulo ka managsuon.
Kamanghuran si Chris sa tulo ka mga managsuon. Matud pa niya nga giidolo niya ang ilang kinamagwangan nga lalaki ug iyang igsuon nga babaye gumikan kay aduna kini hilig sa musika.
“Akong kuya naay banda pero metal rock kanang headbang og pinagrowl ang tingog jud. Akong ate hilig sab mukanta”, suma pa niya
Sa iyang bahin, lahi sab ang timbre sa musika nga iyang gusto. Gusto ni Chris maminaw og mga lumoy nga kanta kun diin dili kini alingogngog sa dunggan.
“Gapaminaw ra jud ko sauna og mga singers sa videoke tung bata pa ko. Hangtod nga perminte nako sigeg videoke ,sundugon ang uban nga singers kun unsaon pagkanta nila. Kadumdom pa ko nga murag Grade 4 ko gipaapil dayon kog contest sa barangay ug eskwelahan”, asoy pa ni Chris.
Ang talento sa pagkanta ni Chris napalambo kini niya sa iyang kinaugalingon nga pamaagi ug nakatabang usab niya ang pagtan-aw og mga video sa vocal coaching.
Gani, niapil sab siya og choir kun diin nakat-on usab siya og nagkadaiyang estilo.
Dugang pa nga mas niusbaw ang iyang pagmahal sa musika sa dihang nalakip siya sa theater group sa Sining Kambayoka Ensemble sa Marawi City niadtong ga-eskwela pa siya sa Mindanao State University. Engineering pa ang kurso nga iyang gikuha niadtong tungura apan wala kini niya mahuman.
Nakahukom nga mobalhin sa Sugbo ang iyang pamilya human nga nagsugod na ang krisis nga ilang giatubang. Nalugi ang ilang negosyo busa napugos siya nga dinhi na mopadayon sa iyang pagtuon.
“Ang pagkalugi sa among negosyo didto ko naka-feel nga lisod kay lisod gyud kaayo. Ug nagkasakit akong papa. Akong papa mild stroke pero garecover naman siya kaluoy sa Ginoo”, siya miingon sa Banat News.
Lahi na karon og panglantaw sa kinabuhi si Chris. Matud pa niya nga kinahanglan nga maningkamot siya ug tugbangan ang kakugi nga gihatag sa iyang amahan samtang lagsik pa kini.
“Akong pamilya. Sila Mama og Papa jud akong rason sa akong pagpaningkamot . Sukad nalugi among negosyo kay naningkamot jud ko para makatabang kay dili ko ganahan nga makita sila nga naglisod. Gihatagan mi nila og nindot nga kinabuhi kaniadto mao nga karon nga dagko nami, kami nasad ang motabang nila “, si Chris misaysay.
Bisan pa man sa kalisdanan nga iyang gisagubang, wala niya gipasalipdan ang iyang pagmahal sa musika. Gani nahimo siya nga bokalista sa banda ug nagsilbi usab siya nga accounts payable and payroll specialist sa usa ka export company.
Alang kaniya, kalingawan ug pampawala sa stress kining maong buhat mao nga sa dihang nasayran niya nga adunay Sinulog Idol nga nagdagan na sa 11 ka tuig, nisalmot siya niini.
Namasin lang gyud si Chris nga masulod sa Top 12 karong tuiga sanglit matud pa niya nga daghan gyud ang mga maayo mokanta ug mapuhalan gyud siya sa mga birit sa mga babaye.
Ang mipatigbabaw sa iyang interest nga moapil mao ang pagkab-ot sa iyang pangandoy nga mahimong kabahin sa nagtubo nga pamilya sa Sinulog Idol.
“Ingon sila nga daghan og workshop sa Sinulog Idol mao nga gipaningkamutan nako makaapil kay gawas nga libre, daghan gyud og makat-onan, makaingon ko nga dili ko ka-afford kun mobayad ko og voice lesson”, matud pa niya.
Wala magdugay si Chris sa kompetisyon sanglit siya ang ikatulo nga nataktak. Matud pa niya nga nagmahay siya nga wala niya mapakita ang iyang tibuok nga abilidad apan mapasalamaton siya sa pagtulun-an nga iyang nadawat gikan sa mga tawo nga nagpaluyo sa maong kompetisyon.
“Dili gyud siya ordinaryo nga singing competition, you will encounter many humps para makita nimo ang results sa change. Daghan og pagsuway kay dinhi man gisukod ang imong ability on how you will grow as a performer and thankful ko kay the guidance continues bisan human na sa contest”, suma pa niya.
Karon, balik na sa normal ang kinabuhi ni Chris, ug bisan pa man sa mga pagsuway nga iyang atubangon, malaumon siya nga makalampos ra siya niini.
“Ampo lang jud ko kanunay sa Ginoo ug salig lang jud always. Think positive. Dapat magpakalig-on permanente sa tanang butang ug kalisdanan. Ug dapat jud mangayo og counsel or tambag sa imong mga friends or sa imong family”, pagtapos pa ni Chris.
FASTFACTS
Name: Chris Ponce J. Olano
Nickname: Chris
Birthday: July 2, 1995
Address: Liloan, Cebu
School & Degree: Father Saturnino Urios University- BS Accounting Technology
Height: 5’5
Weight: 64kgs
Motto: Life is a gift. Enjoy your life to the fullest. Share what God gave you.
Titles/Achievements in Life:
- Tawag ng Tanghalan Visayas Contender 2019
- The Voice JPIA (Junior Philippines Institute of Accountants) - 1st runner up
- Intercolleague United Nations Wide Competition- Champion