Ultimate Oppa ni Bela gisugdan na

CEBU, Philippines — Nilarga na si Bela Padilla sa South Korea sa maiging adlaw alang sa shooting sa romantic movie niya nga  Ultimate Oppa nga ubos sa direksyon ni Jade Castro.

Makapares niya sa maong pelikula mao ang Korean actor nga si Kim Gun-Woo. Dul-an sa tulo ka semana nga moistar si Bela sa maong nasud. Ang maong proyekto gipaluyohan sa  Viva Films, Reality Entertainment, ug ang  Korean film company nga BJ Song of Group 8.

Malipayon si Bela gumikan kay nagsagunson gyud ang iyang pelikula.

Human nagmalampuson  ang  pelikula niya sa Metro Manila Film Festival 2019 nga Miracle In Cell No.7,gihugopan usab sa moviegoers ang pelikula nila ni JC Santos nga On Vodka , Beers and Regrets  nga gipasalida sa miaging semana. 

Parasite nagmadaogon sa Oscars

Mikulit og  kasaysayan ang South Korean film ng a Parasite humana nakadawat kini og upat ka  tropeyo sa  bag-ohay lang nga 92nd Academy Awards.

Ang maong pelikula nagtuki  sa  pobre  nga pamilya  ug adunahan nga pamilya.  Mao kini ang labing una nga  Asian film nga nakadaog isip  Best Picture sa Oscars.

Ang direktor  niini nga si Bong Joon Ho maoy labing una nga  South Korean filmmaker nga nakadaog isip  Best Director. Nakadaog usab ang  Parasite isip Best International Feature Film ug  Best Original Screenplay.

Janella ug  Markus nagtakilid ang relasyon

Dili makadirekta og tubag si Markus Peterson sa pangutana kun buwag nab a sila ni Janella Salvador.

 Igo  ra  nisulti ang aktor nga dili pa siya makahisgot niini.

Nisamot ang pagduda  sa mga  himantayom nga nagkahanap na ang ilang relasyon.

Una na nga na-link si Janella ngadto sa co-star niya sa The Killer Bride nga si Joshua Garcia.

Nabatyagan  nga sweet kaayo sila si  Janella ug Joshua karong panahona.

Juancho ug Joyce nanumpa na

Gikasal na sila si Juancho Trivino ug  Joyce Pring niadtong Dominggo sa hapon didto sa  Sofitel Philippine Plaza sa Pasay City.

Kahinumdoman  nga sa Sta. Rosa, Laguna unta ang  unang venue sa  kasal apan naapektohan  kini  sa pagbuto sa  Bulkang Taal.

Na-engagedang duha niadtong  August 3, 2019 sa Boracay.

Magkauban sila si Juancho ug Joyce sa GMA-7 morning show nga Unang Hirit.

Una na nga giangkon ni  Juancho nga idolo niya si  Joyce. 

Pelikula sa KathNiel plantsado na!

Plantsado na angmovie  reunion nila ni  Kathryn Bernardo ug  Daniel Padilla karong tuiga ug sila ang bida sa  upcoming Star Cinema film  nga After Forever .

Si Cathy Garcia-Molina ang direktor sa maong movie project.

Gikatahong sa San Francisco, USA pagahimoon ang mga eksena niini.

Gawas sa pelikula, una na nga nabalita ang pagbalik sa duha sa telebisyon pinaagi sa teleserye nga nag-ulohan og Tanging Mahal.