MANILA, Philippines — Direkta nang sinagot ni Issa Pressman ang mga paratang na siya ang dahilan ng breakup ng dating showbiz couple na sila Nadine Lustre at James Reid.
Kanina, hindi na napigilan ni Issa, na kapatid ng "Ang Probinsyano" star na si Yassi Pressman, na ipahayag ang kanyang panig sa Instagram.
"[P]ara tapusin ito rito at ngayon, lahat ng 'yan ay 100% FALSE. #ThinkBeforeYouClick," sabi niya sa Inggles, Biyernes.
"Kung mananahimik, 'guilty' ako. Kung manindigan ako, 'defensive.' Huhusgahan ka pa rin ng mundo kahit anong mangyari."
Hinikayat na lang din niya ang lahat na mag-move on sa usapin.
Ika-21 ng Enero nang magpaskil ng litrato ang ate niyang si Yassi kasama si Nadine habang kumakain ng dinner.
Ayaw na raw sana patulan nina Yassi at Nadine ang isyu ngunit sumusobra na raw ang mga tao.
"Ayaw na po sana namin patulan, pero napagdesisyunan naming mag-post ng ganito dahil hindi okey ang cyber-bullying. Kahit kailan, hindi 'yun okay," wika ng ate ni Issa.
Ika-20 ng Enero nang ilantad nina James at Nadine sa palabas na "Tonight With Boy Abunda" na tapos na ang lahat sa kanila.
Ilan sa mga dahilang itinuro nila sa kanilang hiwalayan ay ang pag-focus sa kanilang sarili, karera at personal growth habang sila'y bata pa.