CEBU, Philippines — Happy Flyday Friday mga kaigsuonan! Manglaag na sab ta! Sa walay paglangay-langay, dali na ug ubani ko ninyo, dungan natong sud-ungon ang maka inlove nga katin-aw sa dagat sa Sumilon!
Nahimutang ang Sumilon Island sa lungsod sa Oslob.
Aron makaanhi dinhi, mosakay lang ka og air-conditioned bus ug monaug ka sa Bacugon nga may pletehan nga P 150.00 ug tulo hangtud sa upat ka oras ang biyahe paingon dinhi.
Kung anaa na ka sa Bacugon, adunay mga pumpboat dinhi nga maoy modala kanimo paingon na sa Sumilon ug mokabat lamang sa P60.00 ang pletehan niini. Pito hangtud sa napulo ka minutos lamang ang biyahe paingon sa maong isla.
Taas-taas man tuod ang oras sa imong beyahion, di na unya kini nimo panumbalingon kung masinati na nimo ang katin- aw sa dagat dinhi, ang ka puti sa baybayon ug ang picture-perfect nga porma sa sand bar.
Inig tungtung nimo sa maong isla, adunay mokolekta nimo og P 50.00 isip entrance fee .
Adunay nabantog nga resort dinhi nga gipanag- iya sa pribadong resort kun ugaling gusto mong mag-overnight.
Apan sa gustong mosinati sa lugar ug gustong mag- island hopping lang dinhi, pwede ra gyud kaayo sa adlawan mo magtampisaw sa tin-aw kaayo nga dagat.
Siguradong mawala gyud ang imong stress sa imong paglakwatsa dinhi tungod kay makapasalamat gyud ka sa kahitas-an sa pagtugyan kanato niining maanindot kaayo nga lugar.
Pagdagan-dagan sa dakong hawanan sa sand bar, pagkaligo sa mala crystal nga dagat ug kayaking, maoy pwede nimong buhatun dinhi.
Matud pa sa atong pagpakisusi dinhi, perfect kaayo ang maong lugar sa honeymooners.
Nakapadugang sa atraksyon dinhi mao ang pagpatim-aw usahay sa mga butanding.
Tungod sab sa katin-aw sa dagat dinhi, halos makita na nimo ang mga isda. Kahibawo kong nagpanikad na mo sa pag -anhi, busa unsa pay inyung gilangay-langayan, byahe na!