Sugid ni Maria, midaog sa 40th Cebu Pop

CEBU, Philippines — Kabahin sa paghigugma sa usa binuhat nga dili na mahimo nga makauban pa pag-usab ug igo na lamang sa paghandum, mao kni ang istorya sa awit  nga  nahimong kampiyon sa nahitabong ika-40 nga Cebu Pop Music Festival nga nahitabo niadtong Enero 17  didto sa IEC Convention Center.

Nag-ulohan ang maong awit og “Sugid ni Maria” nga ginama ug sinuwat sa Boholano nga si Joseph Gara. Ang interpreter sa maong awit naggikan sab sa maong probinsiya nga si Orfeshaine Quinones.

Nakahilak ang interpreter nga si Orfeshaine human nga gianunsyo nga sila ang midaog sa maong sangka.

“Wala mi ga-expect modaog kay ang akong gihunahuna lang kay madeliver nako ang kanta og tarong ug mahatagan nako sa sakot nga emosyon. Pagka-announce nga kami ang nakadaog kay mura og nagpakusi pa gyud ko sa akong ate kun tinuod ba gyud ni. Never mi nga nag-expect nga matagaan og ing ani kadako nga recognition ang kanta nga simple lang unta nga base on a true story ,nga kani siya nga story kay mao ni siya ang story sa manghud sa composer gyud ug gihimoan dayon og kanta”, saysay pa ni Orfeshaine.

Gibutyag sa 19 anyos nga si Orfeshaine nga duha ka semana lang nagama ang maong kanta ug dali kini nila nga gisumiter  alang gyud sa Cebu Pop Music Festival sa panghinaot nga masulod kini sa opisyal nga mga entry karong tuiga.

Dako sab og pasalamat si Orfeshaine ngadto sa kompositor gumikan kay siya mismo ang gipili nga interpreter sa maong awit.

“Sige na ko og interpret og mga kanta pero kani ang Sugid ni Maria ang kanta nga nakadaog nga ako mismo ang mi-interpret. Mao nga grabe kaayo akong kalipay ron mao nga emosyonal gihapon ko hangtud karon kay mura’g dili pa gyud fully masulod sa akong utok nga nidaog mi, grand prize pa gyud, ” si Orfeshaine miingon.

Unang higayon sab kini nga misalmot og Cebu Pop Music Festival si Orfeshaine ug mahulagway niya nga lahi ra gyud ang iyang kasinatian sa iyang pagsalmot.

“Everytime nga naay rehearsals kay motabok gyud mi og Cebu gikan sa Bohol kay dili ko ganahan sayangan ang dako nga chance nga nakaapil mi kay kini among pagka-apil lang sa Top 12 kay amo gyud ning giampo ni Senyor Santo Niño”, padayag ni Orfeshaine.

Madala sa   kampo ni Orfeshaine paingon sa Bohol ang P100,000 nga ganti ug Santo Niño trophy.

Sa laing bahin, nahimutang sa ikaduhang pwesto ang awit nga “ABBY” nga ginama ug sinuwat sa 23 anyos nga Barry Villacarillo ug gi-interpret ni Kurt Fick.

Gitug-an ni Barry nga ang maong kanta gisumiter na kini niya sa usa ka songwriting competition sa kauluhan apan wala kini madawat.

“Originally, this is an English song ug akong gi-translate to bisaya song kay para nako kay nindot siya og meaning, makarelate ang kadaghanan and I don’t want my songs nga mausik ”, suma pa ni Barry.

Karon nga nalakip ang maong awit sa Cebu Pop, matud pa ni Barry nga mobalik siya sa Basilica Minore Del Santo Niño aron nga personal nga mopasalamat niini ngadto sa Balaang Bata.

“Moadto gyud og Basilica nga with a heart nga kagustuhan gyud nako ug dili lang nga molabay lang. Mao nga karon, grabe ang blessings nga gihatag sa Santo Niño sa ako and I am forever thankful”, padayag ni Barry. Mapasalamaton sab ang ilado nga musikero sa Sugbo nga si Jay-Arr Librando nga nahimutang sa ikatulo nga pwesto ang awit nga iyang ginama nga “Gugma sa Kasulatan”.

Gani, sa nahitabong finals night, nahimo sab siya nga interpreter kauban si Leela Jae Laburada.

Sa maong awit kabahin kini sa sa gugma sa tanang aspeto sa kinabuhi. “It is about love — love for work, for family and for everything you make, there has to be love”, esplikar pa ni Jay-Arr.

Dugang pa ni Jay-Arr nga ang pagmahal mao ang naghatud kaniya nga makabalik og himo og awit.

Gani, tuig 2018 sa dihang midaog ang iyang ginama nga entry nga “Sugbuanon Ko” kun diin nahimong interpreter ang garbo sa Sugbo nga si Sheenna Belarmino.

Sa maong kasaulugan sa musika, nahimo nga “Best Interpreter” si Charmine Monternel kinsa mao ang miawit  nga Pailob Lang  ginama ug sinuwat ni Fred Monternel ng.

“Super happy nga midaog kay first time nako as an interpreter diri and wala ko ga-expect nga mapilian ko out of 12 nga maayo pud”, si Charmine miingon.  Alang kaniya ang pagkahimo niya nga “Best Interpreter” maingon nga aduna pa diay siya’y maibuga sa pagkanta.

Ang kampo sa “Sugbuanong Musika”  nga pinanguluhan ni Frenyx Tarongoy kinsa nahimong kompositor sa maong awit mao ang nakaangkon sa Best Lyric Video kinsa nakaangkon og kapin sa 2,000 views sa YouTube.

Ang mga miawit sa maong kanta mao ang grupo nga The Basics nga usa ka acapella group nga gilangkuban nila ni Niña Claire Rivaca, Driane Paul Saberon, Chreystle Gealogo, Cyril David Tan, Ian Mark Corrales ug Dave Eroy.

Ang mga hurado sa  Cebu Popular Music Festival, karong tuiga mao sila si  Chiko Pineda, Bryan Balucan, Insoy Niñal, Amor Caparas, Butch Miraflor, Dindin Ranillo ug Judge Simeon Dumdum Jr.

Gihukman nila ang 12 ka mga komposisyon   pinaagi sa 45%  sa musicality, 45% sa  lyrics ug 10% sa audience impact.

Ang ubang finalists sa  Cebu Pop Music Festival karong tuiga mao ang  “Ayaw Gyod” ni Floramie Mamolo nga gi-interpret ni Domiliza Estremos; “Bakho sa Kamingaw” ni Richter Alegado nga gi-interpret ni Angele Lapinid;  “Agalon kong Istrikto” ni Hernando Maniwan nga gi-interpret ni Philipp Mancol; “Duha Na Ta” ni Russel Alegado nga gi-interpret ni Vanessa Parame; “Estudyanteng Tambay” ni Mateo Barulo Jr. nga gi-interpret ni Jerico Barberan; “IPTU” ni Clefford Ray Duran nga gi-interpret ni Jun Villarta; ug “Salamat Cebu” ni Neil Salarda ug gi-interpret ni Yumae Baring.

Ang Cebu Pop maoy  tinuig nga halad sa amahan sa unang distrito sa Probinsya sa  Sugbo    nga si Kongresista   Eduardo R. Gullas  isip pagpadayag sa iyang dakong gugma ngadto sa Balaang Bata nga si Señor Santo Niño ug agig pag-abag usab sa paglambo pa og samot  sa Sugbuanong musika.

Ang Cebuana singer nga si Rizza Navales   may usa sa special guest  sa maong kalihokan.. Nihatag usab og laing kalingawan  ang laing special guest ,  ang grupong SAKDAP. Nilugwa pud sila si  Gerlyn Ville Sanchez Abaño  ug  Yeesha.

Sila si Sam Costanilla ug kanhi Pinoy Dream Academy Scholar nga si Apple Abarquez maoy hosts sa maong edisyon sa Cebu Pop.