Lumalaban sa Mantayupan!

Happiest Friday! And since it’s Friday! It’s a “Fly-day!” Dali na, panggunit ug panghunat na tungod kay luparon na nato ang maanindot nga kalaagan sa Barili, Cebu, ang nabantog nga Mantayupan Falls!

Kung magikan ka sa South Bus Terminal sa Sugbo, mosakay lang ka og bus paingon sa Barili nga nagtangag sa plitehan  P110.00 alang sa aircon buss, P96.00 sa mga regular bus ug P80.00 sa mga minibus.

Anha lang ka monaug sa Shamrock Barili, magpahatud dayon ka’g habal habal paingon sa Mantayupan Falls ug moplete lang ka’g P20.00, masinati na nimo ang kaanindot sa maong lugar.

Sa akong pagbisita dinhi, napa “wow” gyud kaayo ko sa kaanindot sa Mantaypuan.

Ang paghumol sa bugnaw nga tubig nga  gikan  sa falls maoy nakapa- abtik kanako dinoyugan pa sa mga maanindot nga taghuy sa mga kalanggaman nga nagtuyok-tuyok ug naglupad-lupad palibot sa maong lugar, kini maoy pipila sa mga nakapadayeg kanako sa ka-perpekto sa lugar kun  ang pagpa-relax y ang gusto nimong makab-ot.

Sa atong pagsuroy-suroy dinhi, giubanan ta ni Alicia Gonzaga, usa ka staff sa maong soruyanan sud na sa napulo ka tuig ug dinhi atong nasayran nga ang pangalang Mantayupan , usa diay ka Baranggay sa Barili.

Apan matud pa, ang gitungtungang Baranggay sa Mantayupan Falls ginganlan og Campangga ug ginganlan kini’g Mantayupan Falls tungod kay ang tubig nga nidagayday sa maong falls nagikan man sa Baranggay sa Mantayupan. Now you know!

Kapin sa bayente ka tuig na kining gi-develop ug padayong gipanindot ug giatiman sa usa ka kooperatiba nga gitawag og CAMCO o kun Campangga Alayon Multipurpose Cooperative kung diin rehistrado kini sa S. E. C. ug ang mga miyembro niini pulos mga residente sa Barili.

Tinguha gyud sa CAMCO mao ang pagpasemento ug pagpahimo og mga nagkadaiyang kadalanan sud sa maong lugar paingon sa mga falls aron mahimo kining accessible sa mga tawong mosoruy dinhi tungod kay sa mga nakalabay’ng panahon, lisod gyud ang pagsud-ong paingon sa maong lugar.

Sa kinatibuk-ang kita nila dinhi, may igong porsiyento nga maadto sa panudlanan sa Baranggay sa Campangga, sa lungsod sa Barili ug sa probinsya sa Sugbo.

Adunay duha ka mga dagkong falls ang maong lugar, ang usa nahimutang sa ibabaw nga bahin ug ang usa, anaa doul sa entrance.

Mas nakapanindot sa lugar ang bag-o nilang gihimo nga giant hanging bridge paingon sa second falls. Plano sab sa mga kadagkuan dinhi mao ang paghimo og swimming pool doul sa maong falls.

Ubay-ubay sab nga mga life guards ang nakabantay kanunay sa mga bisita.

Abli sila gikan sa alas 6  sa buntag hangtud sa alas 6  sa gabii.  P40.00 ang entrance fee dinhi, P 20.00 sa mga bata ug senior citizen.  Pwede sab mag-overnight dinhi sanglit aduna man sila’y room for rent nga nagkantidad lamang og P1,000.00,  usa kini ka family room ug 24 hours kini mahimong istaran.

Aduna pud kini  restaurant nga nagdalit og  short orders sama sa native chicken adobo, bihon ug pancit.  Ubay-ubay na sab nga mga artista ang nakaanhi dinhi sama nilang Tekla ug usa sa mga nag-unang loveteam sa Pilipinas nga mao silang Daniel Padilla ug Kathryn Bernardo.

Samtang alang sa mga magbarkada o grupo sa mga pamilya nga gustong mahiusa sa usa ka dakong lamesa sa panahong mag salo- salo na, aduna sab sila’y paabangan nga mga lamisa  nga nagkantidad og P 150.00 ngadto  sa P250.00.

Unsa pay inyong gilangayan, mag-Mantayupan Falls na ta!

Amping!