Positibong panglantaw sa kinabuhi

CEBU, Philippines — Dako gyud  nga kaayohan nga  mahatag sa kinabuhi sa tawo kun magpabilin nga positibo ang  panglantaw  niini sa bisan unsa nga butang.

Tungod kay  positibo man ang imong huna-huna , makahunahuna ka og tarong og mga solusyon sa mga butang nga imong gisagobang.

Ania ang pipila ka pamaagi aron magpabiling positibo sa kinabuhi:

• Inigkamata pa lang nimo inigkabuntag, ipaneguro gyud ang maayong tono  sa tibouk adlaw.  Seguro , dili malikayan nga duna mo’y butang nga gikabalak-an , apan ayaw dayon kini huna-hunaa inigkamata nimo aron dili maguba ang imong adlaw.  Puwede nimo isulod sa imong huna-huna ang linya nga  ,” Today is going to be a good day.”

• Ayaw dayon kagoul kun makasugat ka og kahasol ilabi na kun ginagmay ra nga butang. Pananglitan, nitikang ka sa merkado aron paliton ang mga sagol sa sud-an nga gusto nimong lutoon , apan pag-abot nimo, nahutdan na og stocks.  Ayaw ra kasagmuyo, pangita og alternatibong pamaagi,    paghuna-huna og laing sud-an nga mahimo nimong lutoon kun diin ang ingredients niini kay available ra sa merkado.   Ginagmay kini nga butang, apan mapangitaan ra og pamaagi, ug dili na kinahanglan nga maguba pa ang imong adlaw. Sama ra gyud na kun ma-stranded ka sa traffic  , huna-hunaa lang gud nga maabot ra lage ka sa imong padulngan, relax lang.

• Dili sala kun mokatawa ilabi na kun malingaw ka sa usa ka butang. Ginagmay nga komedya, makapa-relax na gyud na nimo. Kun mahulma ang usa ka pahiyom,  segurado  malayo ka sa negatibong butang.

• Dili malikayan nga mapakyas ta sa pipila ka mga butang.  Normal ra usab nga masayop ta sa atong gipangbuhat. Imbes nga magoul,  huna-hunaa lang nga magsilbi kini nga leksyon kanimo aron aduna na ka’y ideya kun unsaon nimo pagdala ang usa ka sitwasyon sa higayon nga makasagobang ka og balik sa susamang sitwasyon.

• Wala gyud  kay mapala  kun kanunay nga negatibo ang naa sa imong huna-huna.  Suwayi ang butang nga kun sa tan-aw nimo makahatag og kaayohan nimo , ayaw kahadlok, salig sa imong kaugalingon.

• Dako usab og tabang  sa pag-uban sa mga higala nga  dunay positibong panghuna-huna. Mga higala nga dili ka hukman, motabang nimo sa paghatag og solusyon sa mga suliran nga imong giatubang.