CEBU, Philippines — Seguradong magmaya karong tuiga (2020) ang child actress nga si Xia Vigor gumikan kay hatagan siya og follow-up projects sa Viva.
Gawas sa mga pelikula, gikatahong papirmahon usab siya og recording contract.
Si Xia ang midala isip anak ni Aga Muhlach sa blockbuster movie nga Miracle in Cell No.7 nga nalakip sa Metro Manila Film Festival 2019.
Nasayran nga nagbaha ang mga positibong feedback sa maong pelikula gumikan sa maayong pagdala nila ni Xia , Aga ug Bella Padilla sa tagsa-tagsa nila nga mga karakter.
Nisikat si Xia sa dihang nahimo kini nga labing una nga grand winner sa segment sa It’s Showtime nga Mini Me 2 kun diin gisundog niya ang hitsura ni Selena Gomez.
Nikisaw usab ang iyang pangalan sa dihang nisalmot siya sa Your Face Sounds Familiar: Kids (season 1) ug gisundog niya ang hitsura sa American singer-songwriter nga si Taylor Swift.
Tatak Cebuana
Nagsugod na sa pagpangandam ang duha ka mga Sugbuanon nga mo-representar sa Pilipinas sa mga prestihiyosong indigay nga ipahigayon sa laing nasud karong tuiga.
Kun maghisgot gani og Cebuana, dili gyud malilong ang pagka-banggiitan niini sa pagrampa sa entablado .
Gawas sa hugyaw nga abilidad niini sa pagpaso, dili usab kini basta-basta gumikan kay nagtangag gyud sila og mga adbokasiya alang sa kababaenhan.
Ang mga Sugbuanon nga motigi sa mga indigay sa laing nasud karong tuiga mao sila si Mrs. Philippines Planet 2019 Cherryl Pelayo-Dacua ug Mrs. Philippines-Continental Lubesly Tellidua.
Gihimo nila nga inspirasyon ang ilang mga pamilya sa maong butang nga ilang gisudlan.
Ang TV host ug beaurty queen nga si Cherryl maoy pambato sa nasud alang sa umaabot nga Mrs. Planet 2020.
Bisan paman nga layo pa ang maong kompetisyon , dili mokompyansa si Cherryl busa gisugdan na gyud niya ang lapad nga preparasyon niini.
Ang maong indigay pagahimoon didto sa Georgia, Europe ug nagpanikad na siya niini.
“In every competiton, kinahanglan gyud ang tumang preparasyon. Samot na gyud kay international pageant, we have to prepare physically, emotionally, mentally, spiritually and financially as well. Importante gyud ang supporta sa pamilya, higala ug sa mga Cebuanos,” matud pa ni Cherryl kinsa nailhan usab isip Ching.
Ang dakong suporta sa iyang pamilya , mga higala ug sa mga Sugbuanon maoy usa sa mga naghatag kaniya og kusog.
“Salamat kaayo sa tanang supporta sa ako ug sa akoa mga kauban sa Mrs. Philippines. It was very overwhelming and it meant a lot for all of us. As we compete for our international pageant, we are hoping and praying that you will continue to support us as we raise the flag of the Philippines in our respective competition,” matud pa niya.
Nagpanikad na usab ang laing Cebuana nga beauty queen nga si Lubesly sa Mrs. Continental 2020 nga pagahimoon didto sa India karong August 2020.
“ Bisan paman nga dugay pa ang umaabot nga pageant gisugdan na nako og andam akong kaugalingon ,” hirit pa niya.
Matud pa niya nga kinahanglan gyud ang lapad nga preparasyon alang niini apan gipaneguro pud ni Lubesly nga dili maapektohan ang pag-atiman niya sa iyang mga anak.
Dinhi mopatigbabaw ang time management , sanglit kinahanglan usab siya nga motrabaho og taman alang sa kaugmaon sa iyang mga anak.
Dakong garbo alang kang Lubesly nga makatungtong sa usa ka international pageant. Mao kini ang ikaduhang higayon nga nakasalmot siya og pageant nga ipahigayon sa laing nasud.
Kahinumdoman nga si Lubesly maoy napili nga Mrs. Asia International 1st Runner-up niadtong 2013 didto sa Malaysia,.
Sa laing hugna sa pagsalmot niya og pageant partikular na ang Mrs. Continental 2020, iyahang ipaneguro nga ma-apply ang iyang mga nakat-onan sa nangagi nga mga kompetisyon nga iyang nasalmotan.
“Kay ang pageant adto man sa India , naghina-hinay nako og study sa culture sa maong nasud. Since ikaduha na ni nako nga pag-compete sa laing country, naa nako’y idea gamay sa dagan sa international pageant, Dako kini nga advantage sa aokng part. Sa pagka karon nag- enjoy usa ko sa holiday kuyog akong pamilya. Human niini, magsugod nako sa akong training sa pasarela, Q and A ug todo gym na gyud ko ani. Hinay hinay napod og pangandam ang akong glam team ug ang mga designers and sponsors,” saysay pa niya.
Nagmalaumon si Lubesly nga makadawat og dakong suporta sa mga Pinoy alang sa pagtungtong niya sa entablado sa laing nasud.
“Sa mga hinigugma nakong Sugbuanon, manghinaot ako nga padayon ko ninyong suportahan as I represent the Philippines sa usa ka pageant sa laing nasud , importante kaayo ang inyong support ilabi na sa online voting puhon. Dako usab og tabang ang inyong mga pag–ampo, “ nagkanayon si Lubesly nga nailhan sa kadaghanan isip Bess.