Mark Michael, waging grand resbak champion

Matapos ang higit isang buwan ng labanan, nanaig sa palakasan ng kantahan at itinanghal na grand resbak champion ang R&B charmer na si Mark Michael Garcia sa huling tapatan ng Tawag ng Tanghalan All-Star Grand Resbak sa It’s Showtime noong Sabado (Disyembre 21).

Nakakuha si Mark Michael ng total combined average score na 54.24% mula sa pinagsamang public votes at hurado scores at tinalo si Jex de Castro na nakakuha ng 45.76%.

Bilang grand champion, panalo si Mark Michael ng P300,000 (tax free), business franchise mula sa Potato Giant, recording contract mula sa TNT Records, management contract mula sa ABS-CBN, at isang tropeo na nilikha ng renowned Filipino visual artist na si Toym Imao.

Sa huling tapatan, nakakuha ng standing ovation si Mark Michael mula sa mga hurado at madlang people matapos niyang mag-perform ng medley ng Chicago hits na You’re the Inspiration, Hard to Say I’m Sorry, at Glory of Love.

 Isang Year 3 grand finalist at Year 2 semifinalist, nanaig si Mark Michael sa Grand Resbak edition, kung saan muling nagsalpukan ang iba’t ibang contenders mula sa tatlong taon ng kumpetisyon.

Samantala, balitang may pasabog ang Tawag ng Tanghalan sa bagong taon sa pagsisimula nila ng ikaapat na taon.