CEBU, Philippines — “Kun unsa man gani ang mahitabo, dili mag-matter ang height, just heart sa game and enjoy ra sa game!”
Kini maoy pagpabuhagay sa 24 anyos nga nahimong CESAFI Season 2019 MVP nga si Sir Shaquille Imperial nga usa sa mga pambato sa SWU Cobras.
Matud pa ni Shaquille nga bisan og ang iyang height anaa na sa 5'10 apan alang kaniya, dili pa gyud kini igo nga gitas-on.
“Para nako kay gamay kaayo, I'm too small. Nag tan-aw ko sa mga varsity before kay grabe ka tag-as ug mga dagko og lawas, but ako ra gi-push akoang self ug kanunay lang nga tiwala kay Lord”, suma pa ni Shaquille kinsa guest sa online show sa Banat News nga BANATanay, duha ka semana na ang nilabay.
Giasoy ni Shaquille nga bata pa lang siya, aduna na gyud siya'y dako nga pagmahal ug hilig sa basketball.
Nakat-on siya og gunit og bola sa dihang nagpangidaron siya og 6 anyos.
Ang iyang amahan nga si Moises Imperial mao ang maingon niya nga labing una nga trainor niya ug mao kini ang hinungdan kun nganong nahimo siya nga varsity.
Matud pa ni Shaquille nga unang korte niya mao ang ilang tugkaran sa ilahang panimalay ug nasundan na kini sa dihang gikuha siya sa usa ka inter-barangay nga liga sa dihang nagpangidaron na siya og 11 anyos.
Giangkon ni Shaquille nga nakalingawan niya ang maong pagduwa gumikan kay gawas nga maka-exercise siya pinaagi sa pagdagan-dagan, aduna pa sab siya'y nakuha nga benepisyo sama sa libre nga edukasyon nga iyang naangkon sa dihang nagpangidaron na siya og 13 anyos kun diin nakatungtong na siya sa high school .
“Mao gyud nga nipadayon ko og basketball para walay gasto sa pag skwela ug makakuha ko og libre na tuition fee, so wala nay problemahon akong parents”, siya Shaquille miingon.
Si Shaquille mipadayag nga bisan og nakatagamtam siya og libre nga edukasyon apan lisod gihapon kini sa iyang bahin isip usa ka tinun-an nga kinahanglan nga mag-maintain og grado.
Mao nga nagkat-on si Shaquille nga ibalanse ang iyang oras sa iyang pagtuon ug sa iyang pagduwa.
“Kahibalo ko nga lisod ang kahimtang, expected gyud na siya. Bisan og lisod but need to enjoy it!”
Miabot na sab sa punto nga hapit niya talikdan ang pagduwa gumikan kay nabali ang iyang wala nga kamot tungod gihapon sa basketball.
“Naproblema ko kay wala mi pangbayad kay mahal kaayo ang X-ray pa lang, unya sa operation kay grabe ka dako og gasto. Pinaka-biggest fear nako mogasto ako family about basketball kay kahibaw ko mahal ra kaayo labi na mabali ang bukog”, pagsaysay pa niya.
Kaluoy sa Ginoo, nakalampos ra sab siya sa maong pagsuway, naalibyuhan kini og nagpadayon gihapon siya sa pagduwa og basketball.
Giangkon ni Shaquille nga bisan og duha lang sila ka managsuon apan lisod gihapon ang kahimtang labi na og nagdungan sila og eskwela mao nga naningkamot gyud siya nga makatabang bisan og sa ginagmay nga pamaagi sa iyang ginikanan kun diin dili kini mabug-atan sa budget sa ilang pagtungha.
Karon, hapit na motapos si Shaquille sa kurso nga Bachelors of Science in Business Administration Marketing Management sa Southwestern University.
Kanunay nga bawnon ni Shaquille ang mga leksyon nga iyang nakat-unan sa sulod ug gawas sa korte.
“Mga desisyon sa life, kinahanglan motimbang –timbang gyud sa desisyon ug anaa gyud ang disiplina ingon man usab ang pagbutang og kasingkasing ilabi na sa pagduwa ug sa tanan nga buhaton sa kinabuhi”, suma pa ni Shaquille.
Motapos si Shaquille sa maong unibersidad nga walay pagmahay gumikan kay nakuha niya ang usa sa iyang mga tinguha nga mahimong MVP.
Sa sunod nga bahin sa kinabuhi ni Shaquille, buot niya nga magtukod og iyang kaugalingon nga negosyo ug kun mapalaran man siya nga kuhaon siya sa Manila, iya kini nga kuhaon nga oportunidad.
“Si Lord na bahala! Enjoy lang gyud ko sa unsa ang mahitabo nako karon. Tiwala lang!”, pagtapos ni Shaquille.
Q&A
BNH: Unsaon pag-manage sa usa ka player ang ilang lovelife?
SHAQUILLE: Make time lang kasi pag gusto mo, hahanap ka nang paraan para sa lovelife but explain sa lovelife nga BASKETBALL FIRST!
BNH: Unsay mga ritual nga buhaton sa usa ka Shaquille una moduwa og basketball?
SHAQUILLE: Mokaon og daghan nga french fries ug spaghetti.