CEBU, Philippines — Mosikad na sa mga sinehan sugod karong adlawa ang pelikulang Mañanita nga gibidahan sa award-winning drama actress nga si Bela Padilla.
Kahinumdoman nga nahimong kabahin kaniadto ang maong pelikula sa Cinema One Originals Festival 2019, ug nakadawat og mga positibong feedback.
Gidala ni Bela ang karakter isip ex-military female sniper nga adunay personal mission aron panimaslan ang tawo nga maoy responsible sa pagpatay sa iyang ginikanan.
Ang Viva Films ug TEN17P maoy nagpaluyo sa Mañanita. Nahimo usab nga kabahin ang maong pelikula sa bag-ohay lang gipahigayon nga Tokyo International Film Festival.
Ang banggiitan nga filmmakers nga sila si Paul Soriano ug Lav Diaz maoy director ug writer sa maong lilas.
Si Direk Paul maoy nagpaluyo sa “Siargao,” nga nakalangkat kaniadto og pito ka major awards sa 2017 Metro Manila Film Festival ug lakip na ang pagka-best director. Siya usab ang naggama sa 2013 film nga “Transit,” ang official entry sa Pilipinas sa Academy Awards niadtong 2014.
Samtang si Lav Diaz, nailhan sa pagama og mga pelikula nga kanunay malakip sa mga international film festivals.
13 years nga way atiman
Gihulagway ni Sunshine Cruz nga lahi gyud ang iyang kinabuhi sa dihang wala pa siya ma-annul ang iyang kaminyuon kang Cesar Montano ug karon nga hingpit na gyud niya naangkon pagbalik ang iyang kagawasan. Matud pa ni Sunshine nga 13 ka tuig siya nga walay atiman sa iyang kaugalingon tungod kay giuna niya ang iyang pamilya. “So nung nahiwalay ako, that was the time that I realized that mahalin ko ang sarili ko, mag-ehersisyo ako, magpaganda ako, magpakulay ako ng buhok. Lahat ginagawa ko yung mga bagay na hindi ko nagawa before”, suma pa ni Sunshine.
Julia, gipilde ni Hipon Girl!
Pilde ang MMK episode nga gibidahan ni Julia Barreto niadtong Sabado sa Magpakailanman episode nga gituonan ni Hipon Girl.
Bida si Hipon Girl sa “Dubai and I” episode sa Magpakailanman nga, matud pa sa AGB NUTAM, nitala og 10.9% nationwide.
Ang MMK episode ni Julia niangkon lang og 8.1%.
Si Harlene Budol o mas naila nga Hipon Girl inanay nga nisikat human siya nilugwa isip usa sa mga co-hosts sa Wowowin ni Willie Revillame sa GMA7.
Samtang, ang opening sa 30th SEA Games nga live nga gisalida sa ABS-CBN niangkon og 13.6%.
Pagka Domingo, nitala og 5.6% rating ang ASAP Natin ‘To batok sa 4.4% sa Sunday PinaSaya.
Ang Banana Sundae nihipos og 4.2%, batok sa 3.8% lang sa Dear Uge.