MANILA, Philippines — Maaari nga bang mag-ibigan ang isang mortal at isang espiritu?
Sa isang kakaibang hotel sa Seoul, South Korea, matutunghayan ng manonood ang kasagutan.
Magtatagpo sa Hotel Del Luna, ang pinakabagong Korean series ng ABS-CBN, na nagsisimulang umere kahapon, Nobyembre 18, sina Nathan (Yeo Jin-Goo), isang Harvard graduate na isa sa mga mahuhusay na batang manager ng mga hotel, at si Jang Man-wol (Korean pop star IU), isang kaluluwang may masakit na nakaraang pumipigil sa kanyang tumawid sa kapayapaan, sa isang hotel na nagsisilbing panuluyan ng mga kaluluwang may hindi natapos na misyon sa buhay.
Nang madiskubre ni Nathan ang kanyang abilidad na makakita ng mga espiritu sa tulong ni Jang Man-wol, sasamahan niya ito sa pagpapatakbo ng hotel. Sa kanilang pagtutulungan, makikilala nila lalo ang isa’t isa. Pero paano kung malaman nilang mas malalim pa roon ang kanilang koneksyon?
Maililigtas kaya ni Nathan si Jang Man-wol sa kanyang mapait na nakaraan?
Pinalitan ng Hotel de Luna ang Codename: Terrius.