The FA is a Queen

CEBU, Philippines — Pagmahal ug pagdawat sa katilingban ang gikinahanglan sa hugpong sa LGBTQI+. Ang gisugyot nga solusyon sa 26 anyos nga transwoman nga  si Jess Labares nga nakoronahan isip Queen Philippines-Universe 2019 mao ang magpakatinuod ug morespeto sa isigkatawo aron nga hingpit nga madawat sa katilingban nga puno sa kritisismo.

Ang pagsalmot ni Jess sa Queen Philippines mao ang nagsilbi niya nga taytayan aron nga mobarog ug motingog alang sa iyang hugpong. Sa laing rason, ang Queen Philippines ang nahimong sinugdanan aron nga makalangkat og mga korona sa nagkadaiyang kompetisyon nga iyang salmutan.

Ang physical therapist nga si Jess mipadayag nga mahinungdanon alang kaniya ang dakong titulo nga Queen Philippines sanglit mao gyud kini ang iyang gipangandoy nga malangkat sukad nga gisulod niya ang kalibutan sa indigay sa kaanyag.

Unang indigay nga gisalmutan ni Jess mao gayud ang Queen Philippines 2017 kun diin si Samantha Dodson nga nagikan sa Leyte mao ang midaog.

“I believe it was really Samantha's time, I was not really that good yet but I cannot say that I am better now. I was just a newbie lang gyud that time”, suma pa niya sa dihang nahinabi si Jess sa Banat News Hugyaw.

Ang pagkalakip sa Top 7 sa maong indigay ang nagtuklod ni Jess nga  mosalmot pagbalik sa prestihiyoso nga kompetisyon alang sa mga transwoman. Apan matud pa ni Jess nga gikinahanglan niya magtigom og mga kasinatian aron nga mohanas pa ang iyang mga mahimong  mga lakang kun mosalmot siya pagbalik sa QP.

Gumikan kay uhaw siya sa pagtulun-an, mipadayon siya sa pagsalmot sa nagkadaiyang beauty pageant.

Wala gyud niya damha nga kanunay nga mag-una ang iyang pangalan sa mga listahan sa mga makoronahan.

Ang labing una nga korona nga naangkon ni Jess mao ang Hiyas ng Digos 2017. Nasundan kini didto sa iyang yutang natawhan sa Leyte kun diin siya ang nahimong Queen of Leyte-World sa susama nga tuig.

Nagsagunson ang suwerte ni Jess niadtong higayon  gumikan kay sa iyang gitrabahoan nga call center company, nagpahigayon kini og Miss Teleperformance United ug siya gihapon ang midaog.

Mao kini ang iyang kahigayunan nga makasakay  sa gimugna nga float sa maong kompanya atol sa Sinulog Parade niadtong 2018.

Dakong garbo alang kang Jess tungod sa kahigayunan nga mahimong kabahin nga piyesta ni Senyor Santo Nino.

Tungod niini,nagpadayon ang maayong kapalaran sa iyang karera nga iyang nasugdan .

Mibalik siya sa Digos City gumikan kay isangka ang mga nakaangkon sa Hiyas ng Digos sa pipila ka mga katuigan. Gitawag ang maong kalihukan og Queen of All Queens”.

Midaog si Jess sa maong indigay.

“I am just being with my myself, I am natural and authentic. I do not copy anyone”, suma pa nia Jess.

Mibalik si Jess sa Sugbo aron nga padayunon ang mga kasikas sama sa pagtungha ug pagpanarbaho.

Miabot ang Mayo, misalmot siya sa sikat nga indigay sa mga transwoman nga mapahigayon sa Mandaue City nga mao ang Lady Liberty – The Mandaue Gay pageant.

Daw dili masukod ang kalipay ni Jess nga nadungagan ang mga gihuptan niya nga mga korona ug mga titulo.

Dakong pasalamat ni Jess nga kanunay nga nagsuporta ang iyang mga kabanay sa tanan niya nga pagabuhaton sa iyang kinabuhi.

Wala siya mapasagdi gumikan kay gidawat gyud siya sa iyang kaliwatan.

Bata pa lang siya Jess, kahibalo na ang iyang ginikanan kun unsa gyud ang iyang pagkatawo  busa wala  siya’y gitagoan sukad pa kaniadto.

Gani, sa dihang nagpaubos siya og operasyon didto sa Thailand, kanunay nga nangumusta ang iyang pamilya sa iyang sitwasyon. Maingon nga mas makapabuhagay pa si Jess sa iyang kaugalingon gumikan kay lig-on ang pundasyon sa pagsalig sa iyang pamilya ngadto kaniya.

“I am really blessed to have a family who keeps on pushing you to chase your dreams and to never stop believing to possibilities”, padayag pa ni Jess.

Kun damgo lang ang hisgutan, natuman na sab ni Jess ang iyang pangandoy nga mahimong flight attendant.

Dili pa lang dugay gisugdan na niya ang iyang katungdanan nga mosilbi sa mga pampasaheroang mga eroplano sa Cebu Pacific.

Si Jess ang labing una nga transwoman nga nahimong FA dinhi sa nasud. “It's overwhelming and fullfilling because it’s everyone's dream especially to biological woman. Maka-flatter siya na I was accepted to become an FA”, matud pa niya.

Kanunay nga mapasalamaton si Jess sa tanang mga kahigayunan nga nabubo sa iyang kinabuhi. Pagbutyag pa ni Jess sa iyang sekreto mao ang kanunay nga morespeto ug magpakatinuod sa kaugalingon ug sa uban aron nga hingpit nga madawat sa katilingban.