Pagtuo Ug Pagbangon

CEBU, Philippines — Dili gyud nato matagna kun unsa ang mga mahitabo pa sa atong kinabuhi.

Gikan sa simple nga pangandoy hangtod nga inanay makab-ot ang mga bituon sa kalangitan.

Mao kini ang istorya sa kinabuhi sa nahimong Tawag ng Tanghalan Season 3 Grand Finalist nga si Ranillo Enriquez.

Lumad nga taga-Cebu ang 52 anyos nga si Ranillo. Taga-Mambaling gyud siya sukad pa niadtong bata pa lang apan niadtong nakapalit og balay ug yuta ang iyang mga ginikanan sa Pardo, didto siya mipuyo sa sulod lang sa 10 ka tuig.

Nakahukom siya nga mobalik sa Mambaling aron nga mas duol siya sa highway.

Nagikan sa pamilya nga musikero si Ranillo. Ig-agaw niya si Rey Ann Fuentes nga misikat niadtong 70s ug 80s kinsa mao sab ang mipasikat sa kanta nga.'Umagang Kay Ganda' ug mao kini ang iyang giidolo.

Matud pa niya nga kanunay kini niya nga paminawon. “Pero kung ako na ang mokanta kay mopiyok gyud ko”, suma pa niya.

Tungod kay nakita niya nga dili para niya ang pagkanta kaniadto, mas giprayoridad na lamang niya  ang pagsayaw.

“Diha gyud ko ni-concentrate. Pag-college kay ni-audition ko sa University of San Jose Recoletos dance troupe. Kahibalo ko nga taas gyud nga height requirement sa lalaki ang ilang gipangita pero ni audition lang gyud ko”, suma pa niya.

Gikaguol ni Ranillo nga wala sa talaan ang iyang pangalan nga makapasar sa maong audition. Nakugang na lamang siya nga gipatawag siya sa opisina sa mipahigayon sa audition. Gipahibalo siya nga wala siya nakapasar gumikan kay kuhaon siya nga choreographer niini.

“Ako dayon ang gihimo nga president sa dance troupe. So, dancing gyud ang akong passion kaniadto. Although I can hit notes pero wala gyud nako siya gitagaan og special attention ang singing,” matud pa niya.

Pag-abot niya og 30 anyos, nihinay na ang iyang metabolism ug nabatyagan na lamang niya nga milapad na ang iyang postura. Daghan na sab ang miingon kaniya nga dili na siya nindot tan-awn sa stage mao nga nakahukom siya nga mokanta na lang.

Nakuhaan niya og inspirasyon ang pagpaminaw sa mga awit gikan sa mga Black American singers.

“Akong kopya-kopyahon ang ilang mga style, ang ilang tingog then naay niingon nako nga nindot daw ko mokanta pero ako gyud silang ingnon nga bati gyud ko og tingog”, siya miingon

Niadtong tuig 1987, nahimo siya nga Born Again Christian ug nahimo siya nga song leader ug worship leader sa ilang simbahan sa ilang dapit sa Mambaling. Nagsilbi kini nga training ground ni Ranillo.

Dili sab malimtan ni Ranillo nga sa dihang nagpahigayon og audition ang Repertory Philippines alang sa pasundayag nga 'Joseph, the Dreamer'.

“Sila si Audie Gemora, Rey Ann Fuentes, ug uban pa nga big stars sa Manila, ang nipahigayon og  stage play dinhi sa Sugbo.  Dili man nila madala ang ilang choir diri kay dako kaayo sila og magasto so nag-hire sila og singers. So, ni-audition ko ”, asoy pa niya.

Nahibulong siya nganong siya lang ang gipatiwas og kanta kay ang mga nag-una niya nga mipaubos og audition, giputol lang ang kanta.

Dugang pa niya nga ang gipangita sab sa maong audition mao ang mga singer nga kamao sab mobasa og nota sa piyesa.

Gipahibalo lamang siya nga tawagan lang siya sa dili pa ang takna sa alas singko sa hapon.

Hapit na ang oras apan wala pa gyud siya kadawat og tawag. Unya adunay niduol kaniya gikan sa production team ug gipahibalo siya nga aduna silay ipahigayon nga press conference aron sa pagpromote sa ilang pasundayag.

Nakugang na sab siya sa gipahibalo niini nga siya na ang mo-handle sa ikaduhang adlaw sa audition sa maong show. Siya na ang milingkod isip hurado.

Gikalipay ni Ranillo ang maong taho  apan nakapangutana sab siya nga 'Unsa man ni ang gibuhat sa Ginoo nako nga laktaw-laktaw man pirmi?'.

Mas gikalipay pa niya nga dili siya kabahin sa choir apan backup singer siya nga aduna gyu'y kaugalingon nga gunitan nga mikropono.

Tungod kay siya ang dili note-reader niadtong tungura, gikinahanglan niya nga tun-an kini aron nga makaapas sa mga kanta.

Mapasalamaton siya sa mga kahigayunan nga  nadawat  siya sa wala damha.

Sa laing bahin, natapos ni Ranillo ang mga kurso nga Computer Science, Management ug Nursing.

Matud pa niya nga mas naglisod siya sa pagtuon sa kurso nga Nursing tungod sa iyang edad. Nitungtong siya og 35 anyos sa  dihang gisugdan niya ang maong kurso.

“Lisod na kay magbasa ko sa whole page twice usa ko makasabot ug lisod sab kaayo ang mga terminologies”, suma pa niya.

Natapos niya ang maong kurso ug mipaubos og board exam. Nakapasar siya niini apan wala kini niya magamit dayon gumikan kay target niya ang manimpad sa Amerika aron nga makatigom ug moapas sa iyang mga kaliwat nga tua na mipuyo.

Aron nga mapuslan gihapon ang maong kurso, nahimo siya nga clinical instructor ug psychiatric nurse sa Vicente Sotto.

Wala gihapon siya magdugay gumikan kay gipangayuan na siya og doctorate degree ug dili na siya gusto pa nga mokuha pa niini.

Nagtudlo na sab siya og English sa mga Asyano sama sa mga Koreano ug mga Hapon apan sulod sa mubo lamang nga panahon.

Human sa maong trabaho, gitug-an niya nga wala na gyu'y direksyon ang iyang kinabuhi. Nabati na sab niya nga nagsigi na og sakit ang iyang tiyan.

“Nasuta nako nga  duna koy  cholelithiasis gallstones. Makuyapan ko kung mosuol pero gidala-dala ko ni for five years kay wala pa koy ikabayad sa operasyon", saysay pa niya.

Gitabangan siya sa iyang mga higala aron nga makaabot sa kwarta nga gikinahanglan alang sa operasyon. Ang ilang balay ug yuta sa Pardo, nahalin na sab alang sa iyang pagpatambal.

Didto siya nakapangutana pagbalik kun unsa pang gikinahanglan niya nga buhaton aron nga mapuslan pa ang gipahulam nga kinabuhi ngadto kaniya.

Hangtod naabot ang panahon nga nisalmot siya sa Tawag ng Tanghalan.

Istorya pa niya nga pinugos lang ang iyang pag-apil gumikan kay giubanan lang niya ang iyang higala nga gusto gyud nga mo-audtion.

Didto sa SM Consolacion, nakita niya nga puros mga batan-on ang mga milinya ug alang kaniya uwaw na ang mosalmot sa maong kompetisyon nga sama niya nga aduna na'y edad.

Usa sa nagtuklod kaniya nga moapil mao ang security guard sa maong mall tungod kay miingon gyud kini kaniya nga 'no age limit'.

Mipirma gihapon siya nga kontra-gusto. Mipaubos sa audition ug nadawat.

Gitawagan siya ora mismo ug wala gyud siya makapangandam. Matud pa niya nga milarga siya sa kauluhan nga P500 lang ang sulod sa iyang bulsa ug wala siya makadala sa iyang mga maanindot nga mga sanina tungod kay wala siya kapanglaba.

Misalang siya nga usa ka pantalon ang gigamit sa usa ka semana tungod kay matud pa nga ang swerte anaa sa iyang pantalon.

Kanunay nga malingaw ang mga hurado kaniya gumikan kay aduna siya'y ginagmay nga mga pakatok ug mausab niya ang areglo sa kanta nga dili gyud maguba ang piyesa.

Karon nga nakalampus na siya sa semi-finals, nangandam na siya sa umaabot nga grand finals. Nanghinaot siya nga suportahan siya sa mga Sugbuanon aron nga mahimong grand champion nga nagikan sa Visayas.

Alang kang Ranillo nga ang paglugwa niya sa Tawag ng Tanghalan nagsilbi kini nga tulay aron nga mapakita sa kadaghanan ang istorya sa pagtuo sa Ginoo nga adunay maayo nga panghitabo sa kinabuhi kun aduna kini pagpaningkamot ug kanunay nga pagsangpit sa iyang ngalan.

Dako ang pagtuo ni Ranillo nga bisan pa man og unsa ang mga ihatag nga pagsulay sa kinabuhi, kinahanglan nga mobangon ug mopadayon sa kinabuhi gumikan kay aduna pa'y dako nga kahigayunan ang nagpaabot alang kanimo.

Dili gyud angay nga kwestyunon ang mga grasya nga gihatag sa Ginoo diha kanimo. Kun maayo man kini o dili, angayan gihapon kini nga pasalamatan gumikan kay bisan og dili man kini maayo sa imong panan-aw, magsilbi kini nga leksyon aron nga mapangitaan kanimo og paagi.