CEBU, Philippines — Sa una nga pag-aninag mo pa lang sa iyang panagway, tataw ang talagsaon niya nga kaanyag. Diha usab sa iyang mga mata nimo mabatyagan, ang bulawanon niyang kasingkasing.
Siya walay lain kundili ang kasamtangan nga Sinulog Festival Queen nga si Nicole Borromeo.
Ang 18 anyos mao ang mirepresentar kaniadto sa syudad sa Carcar kun diin ang iyang talagsaon nga katakus sa kinasingkasing nga pagsayaw sa Sinulog mao ang naghatod kaniya sa korona.
Dili lang usa ka korona ang iyang nauli niadtong Enero, sanglit siya usab ang napilian nga morepresentar sa Reyna ng Aliwan 2019 ug Miss Millennial 2019.
Dagko nga mga responsibilidad ang anaa sa mga abaga sa 18 anyos nga dalaga sanglit dili pa maingon nga hinog ang iyang mga kasinatian sa kalibutan sa indigay.
Gibutyag ni Nicole dinhi aa Banat News Hugyaw nga ang pagdaog niya sa Festival Queen niadtong Enero mao ang iyang labing dako nga korona.
"I think, they found something in me that I should be crowned and I am forever thankful of it always since first crown is worth-remembering", saysay pa ni Nicole.
Nagsugod si Nicole sa pagsalmot og mga indigay sa edad nga 15 didto sa sa Cebu Doctors University.
"Napilian ko sa akong mga teachers because I was tall daw and then I gave it a try then I won", suma pa niya.
Sukad niadto, nagpadayon na kini hangtud nga nahimo na siya nga kabahin sa district meet hangtud sa Cebu City Olympics ug sa Miss Cesafi kun diin giharos kini niya og daog.
Nalingaw usab si Nicole sa maong buhat kun diin komportable ra siya niini.
Sa edad nga 16 anyos, nadiskubre siya sa nangulo sa Shutter Models nga si Rabie Ian Pogoy. Dinhi na nagsugod ang pagkamodelo ni Nicole ug gisangka pa siya sa mga dagko nga mga indigay nga nahitabo dinhi sa Sugbo.
Nisalmot siya sa Miss Silka 2017 ug Miss Mandaue 2018. Dinhi na mas nihumot ang pangalan ni Nicole tungod kay dili man siya ang makoronahan apan kanunay nga mag-una ang iyang pangalan nga pilianan sa kun kinsa ang modaog. Wala siyay pagmahay gumikan kay alang kaniya, dako nga garbo kini nga makasalmot sa mga prestihiyoso nga mga indigay.
Sa kadaghang kasikas sa Sugbo, kanunay nga anaa ang presensya ni Nicole ilabi na kun mga dinagko nga fashion show.
Dinhi mas nabansay-bansay ni Nicole ang iyang postura sa matag higayon nga morampa na siya.
Dako nga pagsuway kaniadto Sinulog Festival Queen, gumikan kay dili lalim ang pagsayaw sul-ob ang bug-at nga costume, apan kanunay siya nga misangpit sa Ginoo nga unta mamaayo niya ang iyang pagahimuon nga pasundayag sa kadalanan ug sa dakong entablado sa Cebu City Sports Complex.
Dili masukod ang kalipay ni Nicole sa dihang gianunsyo nga siya ang nakaangkon sa dakong korona karong tuiga.
"My heart was so full. Wala ko kasabot what to really feel kay I was tired na gyud kay bug-at ang costume but I made that far, the happiness was really overflowing", padayag ni Nicole.
Diretso na ang dinagkong kadaugan ni Nicole sa natad sa indigay sa kaanyag. Kini human usab siya nidaog isip Reyna ng Aliwan niadtong Abril.
"It is really overwhelming knowing at my young age, I got to represent on the pageant where veterans usually joined. I feel honored as well that I won where my fellow Cebuanas where also crowned", matud pa niya.
Human siya nakoronahang Reyna ng Aliwan 2019, sa sunod adlaw niini mao ang pagsugod sa unang adlaw alang sa Miss Teen Philippines.
Gitug-an niya nga nagkuwang siya sa tulog apan padayon gihapon siya nga misangka. Bisan pa man, mitapos siya sa maong indigay isip Second Runner Up.
Inanay nga nailhan na si Nicole sa kauluhan tungod sa mga kadaugan nga iyang naangkon sa nasyonal nga mga pasundayag.
Karong tuiga, mao kini ang labing puno nga schedule sa rayna sa Cebu gumikan kay siya ang mosangka alang sa Miss Millennial 2019 sa Eat Bulaga sa Kapuso network.
Target niya nga malangkat ang back-to-back crown karong tuiga sanglit kasamtangang gihuptan ang maong titulo sa laing Cebuana nga si Shaila Rebortera.
Kasamtangang nagkuha karon sa kurso nga interior design si Nicole ug prayoridad gyud niya ang pagtuon aron nga mas aduna pa'y makuha nga igo nga pagtulun-an sa kinabuhi.
Dili gyud niya usikan ang mga maayong oppurtunidad sa Miss Millennial 2019 ilabi na nga dili basta-basta ang pagpili niini og mga kandidata.
Dako ang pagtuo ni Nicole nga makalampos siya sa iyang tinguha gumikan kay gawas nga millennial sab siya og pangutok, kahibalo na sab siya kun unsaon niya pagdala ang iyang kaugalingon ug nasayod kun unsa ang iyang tumong sa kinabuhi kun nganong gibutang siya sa maong posisyon.
Gusto niya nga mapamatud-an nga duna gyuy ikabuga ang kabatan-onan sa pagpalambo sa komunidad ug usa na niini ang turismo.