SEEN: Ang Cuddle Weather ng Regal Entertainment Inc. ang unang mainstream movie ng 28-year-old director na si Rod Marmol. Umaasa si Rod na mabibigyan ng PG-13 classification ng MTRCB ang Cuddle Weather sa kabila ng mga maseselan na dialogue nina Sue Ramirez at RK Bagatsing, ang lead stars ng pelikula. Ang pelikula ang official entry ng Regal sa 3rd Pista ng Pelikulang Pilipino na magsisimula sa September 13, 2019.
SCENE: Patuloy na pinipilahan sa box-office ang Just A Stranger ng Viva Films. Nawalan ng pagkakataon ang PPP na magkaroon ng isang blockbuster entry dahil hindi pumasa sa panlasa ng selection committee ang pelikula nina Anne Curtis at Marco Gumabao na pinupuri ng moviegoers. Mula sa 200 cinemas nationwide, 220 na ang bilang ng mga sinehan na pinagtatanghalan nito.
SEEN: Mula pa noong member siya ng Pop Girls, fan ni Nadine Lustre ang high-profile lawyer na si Atty. Ferdinand Topacio na nagkaroon ng block screening para sa Indak bilang suporta sa kanyang hinahangaan na aktres. Ang makilala nang personal si Nadine ang isa sa mga pangarap ni Atty. Topacio.
SCENE: Ginamit na ring tone ang Budots sa cellphone ng karakter ni Lou Veloso sa Mina-Anud. Ikinuwento ni Lou na walang ring tone ang kanyang cellphone nang kunan ang mga eksena niya para sa pelikula nina Dennis Trillo, Matteo Guidicelli at Jerald Napoles. Obvious na ginamit na ring tone ang Budots sa Mina-Anud dahil sa ingay na nilikha at popularidad ng campaign ads ni Senator Bong Revilla sa nakaraan na midterm elections.
SEEN: Ang sexy star na si Zarah Tolentino ang ipinalit sa aspiring actress na si Stacey Gabriel bilang leading lady ni Dennis Padilla sa Sanggano, Sanggago’t Sanggwapo, ang comedy movie ng Viva Films na may playdate sa September 4, 2019.
SCENE: Si Gary Valenciano ang surprise special guest sa 60th birthday ni Linda Nacino, ang ina ni Rocco Nacino na ipinagdiwang ang kaarawan sa isang bistro sa Makati City.
SEEN: Pinaghahandaan ni Prince Stefan ang nalalapit na rhinoplasty procedure sa kanya. Nagdesisyon si Prince na muling ipaayos ang ilong nito dahil palpak ang resulta ng dalawang beses na nose job sa kanya noong 2013 at 2016.